மேத்ஸ்,பயாலஜி குருப்பில் சேர ஆர்வம் குறைவு

கடந்த ஆண்டு, உயிரியல் தேர்வு கடினமாக வந்ததின் எதிரொலியாக, பிளஸ் 1 சேர்க்கையில், 'மேத்ஸ், பயாலஜி' பிரிவில் சேரும் ஆர்வம், மாணவர்களிடையே குறைந்துள்ளது.

தமிழகத்தில் நடந்து முடிந்த பிளஸ் 2 தேர்வில், பயாலாஜி தேர்வில் வினாத்தாள் மிக கடினமான முறையில் வடிவமைக்கப்பட்டிருந்தது. இதனால், நன்கு படித்த மாணவ, மாணவியரும் தடுமாறும் நிலை ஏற்பட்டது. இந்நிலையில், 10-ம் வகுப்பு தேர்வு முடிவுகள் வெளியான நிலையில், சுயநிதி பள்ளிகளில், பிளஸ் 1 மாணவர் சேர்க்கை நடந்து வருகிறது. பிளஸ் 1 சேர்க்கையை பொறுத்தவரை, கணிதம், உயிரியல், வேதியியல், இயற்பியல் அடங்கிய தேர்வு செய்வதில், மாணவர்கள் முன்னுரிமை கொடுப்பது வழக்கம். ஏனெனில், இன்ஜினியரிங் மற்றும் மருத்துவம் உள்ளிட்ட எந்த பிரிவையும் தேர்வு செய்ய வசதியாக இருக்கும்.

இதனால், இந்த பிரிவில் சேர, அதிக போட்டியும் இருந்து வந்தது. நடப்பு கல்வியாண்டில்:ஆனால், கடந்த ஆண்டு வினாத்தாள் வடிவமைப்பு மற்றும் ஆசிரியர்களின் வழிகாட்டுதல் ஆகியவற்றால், கடந்த ஆண்டை விட, நடப்பு கல்வியாண்டில், மேத்ஸ், பயாலஜி அடங்கிய முதல் பிரிவில் சேர்வதற்கான ஆர்வம், மாணவ, மாணவியரிடையே கணிசமாக குறைந்துள்ளது. இதுகுறித்து ஆசிரியர்கள் கூறியதாவது:மேல்நிலைக்கல்வியில், உயிரியல் பிரிவில், விலங்கியல் மற்றும் தாவரவியல் ஆகிய இரு பாடங்கள் உள்ளன. இதில் விலங்கியல் பாடத்தை பொறுத்தவரை, 75 மதிப்பெண்களுக்கு தேர்வு எழுதுவதாக இருந்தாலும், 150 மதிப்பெண் அளவுக்கு பாடம் அதிக அளவில் உள்ளது.

அதாவது பியூர் சயின்ஸ் குரூப்பில் உள்ள விலங்கியல் தேர்வுக்கு, 150 மதிப்பெண்களுக்கு, 8 பாடம் படிக்க வேண்டும் என்றால், 'உயிர்-விலங்கியல்' தேர்வுக்கு, 75 மதிப்பெண்களுக்கு, 7 பாடங்கள் படிக்க வேண்டும். இதனால், சராசரியாக இருக்கும் மாணவர்களிடையே தடுமாற்றம் ஏற்படுகிறது.நான்கு பாடங்களிலும், 'சென்டம்' எடுக்க முடியும் என்ற மாணவர்களுக்கு, முதல் குரூப் எடுப்பதில், எவ்வித சிரமமும் இருப்பதில்லை. சராசரி மாணவர்களுக்கு, இயற்பியல், வேதியியல் பாடம் நடத்தும் ஆசிரியர்களும், 'உயிரியல்' எடுத்து ஏன் கஷ்டப்படுகிறீர்கள். கம்ப்யூட்டர் சயின்ஸூக்கு அதிக உழைப்பு தேவையில்லை' என, திசை திருப்பிவிடுகின்றனர். சிறந்த சாய்ஸ்:இதனால், சராசரியாக படிக்கும் மாணவர், இன்ஜினியரிங் செல்ல வேண்டும் என, ஆசைப்படும் பட்சத்தில், அவர்களுக்கு கணிதம், இயற்பியல், வேதியியல், கம்ப்யூட்டர் சயின்ஸ் அடங்கிய குரூப் சிறந்த சாய்ஸாக உள்ளது. எம்.பி.பி.எஸ்., கிடைக்காவிட்டாலும், நர்சிங், பி.பார்ம்., உள்ளிட்ட மருத்துவத்துறை தான், என்னுடைய சாய்ஸ் எனக்கூறும் மாணவர்களுக்கு, விலங்கியல், தாவரவியல், வேதியியல், இயற்பியல் அடங்கிய பியூர் சயின்ஸ் குரூப் கைக்கொடுக்கும்.

ஊரக பகுதிகளில், பியூர் சயின்ஸ் குரூப்பில் சேர, அதிக அளவில் மாணவர்கள் ஆர்வம் காட்டுகின்றனர். நகர்ப்புறங்களில், கடந்த ஆண்டை விட, நடப்பு ஆண்டு, உயிரியல், கணிதம் அடங்கிய குரூப்பில் சேர, ஆர்வம் குறைந்துள்ளது. இவ்வாறு அவர்கள் கூறினர்.

கடந்தாண்டு பிளஸ் 2தேர்வெழுதியோர் இந்த ஆண்டு மருத்துவம் படிக்கலாமா?

சேலத்தை சேர்ந்த மாணவி ரம்யா என்பவர் சார்பாக அவர் தந்தை கருணாநிதி உள்பட பலர் சென்னை உயர்நீதிமன்றத்தில் மனுக்களை தாக்கல் செய்தனர். அதில் அவர்கள் கூறியிருப்பதாவது: இந்த ஆண்டு அரசு மருத்துவக்கல்லூரியில் சேர விண்ணப்பித்துள்ளோம். ரேங்க் பட்டியல் வெளியிடப்பட்டுள்ளது. இந்த ஆண்டு படித்த மாணவர்கள் பலர் குறைவாக கட் ஆப் மார்க் பெற்றுள்ளனர்.

இயற்பியல் பாடத்தில் குறைவான மாணவர்கள்தான் 200க்கு 200 மார்க் பெற்றுள்ளனர். அதுபோல உயிரியல் பாடத்திலும் குறைவான மாணவர்கள்தான் 200க்கு 200 மார்க் பெற்றுள்ளனர். ஆனால் கடந்த ஆண்டு அதிகமான மாணவர்கள் 200க்கு 200 மார்க் பெற்றுள்ளனர். கடந்த ஆண்டு கட் ஆப் மார்க் அதிகமாக இருந்ததால் பல மாணவர்களுக்கு மருத்துவ கல்லூரியில் இடம் கிடைக்கவில்லை. இதனால் இவர்கள் இந்த ஆண்டு மருத்துவக்கல்லூரிக்கு விண்ணப்பித்துள்ளனர். எனவே எங்களுக்கு கிடைக்க வேண்டிய இடங்களை அந்த மாணவர்களுக்கு கிடைத்து விடும்.

இதனால் நாங்கள் பாதிக்கப்படுவோம். எனவே கடந்த ஆண்டு மாணவர்கள் இந்த ஆண்டு விண்ணப்பித்தால் அதை ஏற்க கூடாது. அவர்களை தேர்வு செய்ய மருத்துவ கவுன்சிலுக்கு தடை விதிக்க வேண்டும் என மனுவில் கூறியிருந்தனர். இந்த மனுவை நீதிபதி சத்தியநாராயணன் விசாரித்து மனுதாரர்களின் கோரிக்கையை அரசு பரிசீலித்து உரிய முடிவு எடுக்க வேண்டும் என உத்தரவிட்டார்.

வரும் 27ம் தேதிக்கு வழக்கு விசாரணையை தள்ளிவைக்கப்பட்டது. இந்த வழக்கில் மனுதாரர் சார்பில் வக்கீல்கள் ராகவாச்சாரி, கே.செல்வராஜ் ஆகியோர் ஆஜராகி வாதாடினர்.

பிளஸ் 2 மறுமதிப்பீடு 15ல் வெளியீடு

பிளஸ் 2 தேர்வில் மறு மதிப்பீடு மற்றும் மறு கூட்டல் முடிவுகள் வரும் 15ம் தேதி வெளியிடப்படுகின்றன.பிளஸ் 2 தேர்வில், மறு கூட்டலுக்கு 2,835 பேர் விண்ணப்பித்ததில் 696 பேருக்கும் மறு மதிப்பீடுக்கு விண்ணப்பித்த 3,502 பேரில் 2,782 பேருக்கும் மதிப்பெண் மாற்றம் உள்ளது.

இந்த முடிவுகள் வரும், 15ம் தேதி http:/www.dge.tn.nic.in என்ற இணையதளத்தில் வெளியிடப் படுகிறது. மதிப்பெண் வராதவர்களுக்கு மதிப்பெண்ணில் மாற்றம் இல்லை என்று எடுத்துக் கொள்ள வேண்டும். மதிப்பெண் மாற்றம் உள்ளவர்களுக்கு வரும், 16ம் தேதி தற்காலிக மதிப் பெண் சான்றிதழ் வழங்கப்படும் என, தேர்வுத்துறை இயக்குனரகம் அறிவித்துள்ளது.

ஆசிரியர்கள் ஒழுங்காக பாடம் நடத்துகிறார்களா? கண்காணிக்க உத்தரவு

அரசு உதவிபெறும் பள்ளிகளில், இலவசப் பொருட்கள் வழங்குதல், ஆசிரியர் பணி நியமனம் உள்ளிட்ட ஆவணங்களை நேரில் ஆய்வு செய்து, அறிக்கை தர வேண்டும்' என, உதவி தொடக்கக் கல்வி அலுவலர்களுக்கு, தொடக்கக் கல்வி இயக்குனர் உத்தரவிட்டு உள்ளார்.இதுதொடர்பாக, அவர் பிறப்பித்துள்ள உத்தரவு: *

ஒவ்வொரு உதவி தொடக்கக் கல்வி அலுவலரும், ஜூன் முதல் ஏப்ரல் வரை, குறைந்தது, ஒரு மாதத்தில், 18 பள்ளிகளில் ஆய்வு செய்ய வேண்டும்.

* மாணவர், ஆசிரியர் வருகைப் பதிவேடு, இலவசத் திட்டங்களின் செயல்பாடு, பயனாளிகளின் விவரங்கள் முறையாக பராமரிக்கப்படுகிறதா என, பார்க்க வேண்டும்; அதன் நகலைப் பெற வேண்டும்.

* பள்ளியில், ஒரு வேலைநாள் முழுவதும் இருந்து, பள்ளியின் நடவடிக்கை, ஆசிரியரின் கற்பித்தல், மாணவரின் கற்றல், கட்டமைப்பு வசதி, தேர்ச்சி விகிதம், குறைபாடுகள் போன்றவற்றை ஆய்வு செய்து, அறிக்கை தயார் செய்ய வேண்டும்.

* மாணவர்களிடம் கலந்துரையாடி குறைகளை கேட்க வேண்டும்.

* கழிப்பறை, குடிநீர் வசதி மற்றும் பராமரிப்பு நிலை, கணினி உள்ளிட்ட பொருட்களின் பயன்பாடுகள் குறித்து கண்டறிய வேண்டும்.

* ஆபத்தை ஏற்படுத்தும் திறந்தவெளிக் கிணறுகள், இடிந்த, இடியும் நிலைக் கட்டடங்கள், உயரழுத்த மின் கம்பங்கள் போன்றவற்றால் பிரச்னை இருந்தால், உடனடியாக அறிக்கைத் தாக்கல் செய்து, அதன் மீது விரைந்து நடவடிக்கை எடுக்க வேண்டும்.இவ்வாறு, அவர் உத்தரவிட்டு உள்ளார்.

Scholarship details

Click below

https://app.box.com/s/vf6l5nd75e4d8z5bsepdt5uf0m55wba1

ஜூலை 1ல் ஆசிரியர் பயிற்சி கவுன்சிலிங்

தமிழகத்தில் அரசு மற்றும் தனியார் ஆசிரியர் பயிற்சி பள்ளிகள் மொத்தம் 412 இயங்கி வருகின்றன. இவற்றில் 15000 இடங்கள் உள்ளன. இவற்றில் 2300 இடங்கள் அரசு ஆசிரியர் பயிற்சிக்கு ஒதுக்கப்பட்டுள்ளது. இவற்றில் இந்த ஆண்டுக்கான மாணவர் சேர்க்கை நடத்த மாநில ஆசிரியர் கல்வி ஆராய்ச்சி மற்றும் பயிற்சி இயக்ககம்(எஸ்இஆர்டி) முடிவு செய்துள்ளது.

சேர்க்கை விண்ணப்பங்கள் மே மாதம் 14ம் தேதி வினியோகிக்கப்பட்டன. பூர்த்தி செய்யப்பட்ட விண்ணப்பங்கள் கடந்த 4ம் தேதி வரை பெறப்பட்டன. இதுவரை 3350 பேர் ஆசிரியர் பயிற்சி பள்ளியில் சேர்வதற்காக விண்ணப்பித்துள்ளனர். மாணவர் சேர்க்கைக்கான ரேண்டம் எண்கள் 22ம் தேதி வெளியிட மாநில கல்வி ஆராய்ச்சி மற்றும் பயிற்சி இயக்ககம் முடிவு செய்துள்ளது.

இதையடுத்து, ஜூலை 1ம் தேதி மாணவர் சேர்க்கை நடக்கிறது. ஒற்றைச் சாளர முறையின்(கவுன்சலிங்) கீழ் மாணவ மாணவியர் தேர்வு செய்யப்படுவார்கள்.

பெண் அரசு ஊழியர்களுக்கு முதல் பிரசவத்தில் இரட்டை குழந்தைகள் பிறந்தாலும் இரண்டாவது பிரசவத்துக்கும் மகப்பேறு விடுமுறை வழங்க வேண்டும்

ராமநாதபுரம் மாவட்டம் ஆர்எஸ்மங்கலம் அரசு மேல்நிலை பள்ளி ஆசிரியை பிரியதர்ஷினிக்கு 2011-ம் ஆண்டு முதல் பிரசவத்தில் இரட்டை குழந்தைகள் பிறந்தன. அப்போது 180 நாட்கள் ஊதியத்துடன் கூடடிய விடுமுறை அவருக்கு கிடைத்தது. இதனை உயர்நீதிமன்ற மதுரை கிளையில் தாக்கல் செய்துள்ள மனுவில் தெரிவித்திருந்த பிரியதர்ஷினி கடந்த ஆண்டு 2-வது பிரசவத்திற்காக 179 நாட்கள் விடுமுறை எடுத்து தாம் பணிக்கு திரும்பியதாக குறிப்பிட்டுள்ளார். ஆனால் இரட்டை குழந்தைகள் இருப்பதை மறைத்து விடுமுறை பெற்றதாகவும், அதனை ஊதியமில்லா விடுமுறையாக மாற்றி பள்ளி கல்வி இணை இயக்குநர் உத்தரவிட்டுள்ளதாகவும் ஆசிரியை தெரிவித்துள்ளார்.

இரண்டாவது பிரசவத்துக்கு விடுமுறை எடுக்க தமக்கு உரிமை உள்ளதால் விடுமுறை காலத்தில் பெற்ற ஊதியத்தை திரும்ப செலுத்துமாறு பள்ளி கல்வித்துறை பிறப்பித்த உத்தரவை ரத்து செய்ய வேண்டும் என்றும் பிரியதர்ஷினி கோரியிருந்தார். இந்த வழக்கை விசாரித்த நீதிபதி வைத்தியநாதன் முதல் பிரவசத்தில் இரட்டை குழந்தைகள் பிறந்ததை வைத்து 2-வது பிரசவத்துக்கு விடுமுறை தர மறுக்க முடியாது எனக் கூறினார்.

பெண் ஊழியர்களின் உடல்நிலையை கருத்தில் கொண்டு அவர்களின் பாதுகாப்புக்காகவே மகப்பேறு விடுமுறை அளிக்கப்படுவதாக நீதிபதி தெரிவித்தார். எனவே 2-வது பிரசவத்துக்கு மகப்பேறு விடுமுறை வழங்க வேண்டும் என உத்தரவிட்ட நீதிபதி மகப்பேறு விடுமுறைக்கு வழங்கப்பட்ட சம்பளத்தை பிடித்தம் செய்யும் உத்தரவுக்கு இடைக்கால தடை விதித்து ஜுன் 23-ம் தேதிக்கு வழக்கை ஒத்திவைத்தார்.

இலவச பாடப்புத்தகங்களுக்கு அலையும் ஆசிரியர்கள்

அரசு மற்றும் அரசு உதவி பெறும் பள்ளிகளுக்கு தமிழ்நாடு பாடநுால் கழகம் சார்பில் இலவச பாடப் புத்தகங்கள் வழங்கப்படுகின்றன. இந்த ஆண்டு பள்ளிகள் திறக்கும் முன், மே மாதத்தில் புத்தகங்கள் வழங்க ஏற்பாடு செய்யப்பட்டது.பாடநுால் கழக மண்டல அலுவலகங்கள் மற்றும் கிடங்குகள் மூலம் புத்தகங்கள் வழங்கப்பட்டன. ஒரு மாதத்துக்கு முன் புத்தகம் வழங்கும் பணி துவங்கினாலும் இன்னும் இழுபறி நிலையே உள்ளது.

தினமும் ஒரு சில வகுப்புகளுக்கு ஒரு சில பாடங்களுக்கு மட்டுமே பாடப் புத்தகங்கள் வினியோகம் செய்யப்படுகின்றன. ஒவ்வொரு முறையும் ஏதாவது ஒரு பள்ளி அல்லது மண்டல அலுவலகங்களை குறிப்பிட்டு அங்கு சென்று புத்தகங்கள் எடுத்துக் கொள்ள ஆசிரியர்களுக்கு உத்தரவிடப்படுகிறது.ஆனால் புத்தகங்களை சுமக்க தனி ஊழியர்களோ, எடுத்து வர தனி வாகன வசதியோ அளிக்கப்படுவதில்லை. அத்துடன், 'ஸ்டாக்' சரியாக வைக்காததால் தினமும் ஏதாவது ஒரு வகுப்புக்கான புத்தகங்கள் கிடைப்பதில்லை என ஆசிரியர்கள் மற்றும் அரசு உதவி பெறும் பள்ளி நிர்வாகத்தினர் வருத்தம் தெரிவித்துள்ளனர்.

புத்தகத் தேவையை முன்கூட்டியே சரியாகக் கணக்கிட்டு அச்சிடுவதில் முறையாகத் திட்டமிட்டு புத்தகக் கிடங்குகளுக்கு கொண்டு வந்திருக்கலாம். மாறாக சரியாகத் திட்டமிடாமல், சில புத்தகங்கள் இருப்பு வைக்கப்பட்டும், சில புத்தகங்கள் இருப்பு இல்லாமலும் ஆசிரியர்கள் அலைக்கழிக்கப்படுகின்றனர்.இதுகுறித்து ஆசிரியர்கள் கூறும்போது 'மற்ற இலவச பொருட்களை வாகனங்களில் ஏற்றி, பள்ளிகளுக்கு கொண்டு வந்து இறக்குவது போல் பாடப் புத்தகங்களையும் வினி யோகித்தால் கல்விப் பணிகள் பாதிக்கப்படாமல் இருக்கும்.

அதையும் பாடநுால் கழகம் முறையாகச் செய்யாமல் அலட்சியம் காட்டுகிறது' என்றனர். அதிகாரிகளிடம் கேட்டபோது 'புத்தகம் அச்சிட்டு வழங்க மட்டுமே அரசு நிதி ஒதுக்குகிறது; வாகனங்களில் ஏற்றிச் செல்ல நிதி வழங்கவில்லை. 'ஸ்டாக்' இருக்கும் போது எடுத்துக் கொள்ள வேண்டியது தான்' என்றனர்.

டாக்டர்கள் இனி மருந்து சீட்டில் கிறுக்க முடியாது

நோயாளிகளுக்கு கொடுக்கப்படும் மருந்து சீட்டில், மருத்துவர்கள் இனி படிக்கக்கூடிய வகையில் தெளிவாகவும், பெரிய எழுத்துகளாலும் எழுதுவது கட்டாயமாகிறது.இதுகுறித்து, மத்திய சுகாதாரத் துறை உயரதிகாரி ஒருவர் கூறியதாவது:நோயாளிகளுக்கு தரும் மருந்து சீட்டில், மருத்துவர்கள் இனி தங்களது இஷ்டம் போல் கிறுக்க முடியாது.

இந்திய மருத்துவ கவுன்சில் விதிமுறைகளின் கீழ், இதற்கென, அரசிதழில் அறிவிப்பை சுகாதார அமைச்சகம் மிக விரைவில் வெளியிட உள்ளது. அதன்படி, மருத்துவர்கள் இனி, நோயாளி களுக்கு தரும் மருந்து சீட்டில், தெளிவாகவும், பெரிய எழுத்துகளாலும் எழுத வேண்டியது கட்டாயம்.

மேலும், நோயாளிகளுக்கு குறைந்த விலையில் மருந்து கிடைப்பதற்கு உதவும் வகையில், மருத்துவர்கள் இனி பரிந்துரைக்கும் மருந்து சீட்டில், மருந்தினுடைய பிராண்ட் பெயரை எழுதாமல், பொதுப் பண்பு அடிப்படையிலான பெயர்களை மட்டுமே பரிந்துரைக்க வேண்டும். இவ்வாறு, அவர் கூறினார்.

அக இ - 20.06.2015 மற்றும் 27.06.2015 அன்று நடைபெறவுள்ள தொடக்க / நடுநிலைப் பள்ளி ஆசிரியர்களுக்கான குறுவள மைய பயிற்சியில் மாவட்டத் தொடக்கக் கல்வி அலுவலர் மற்றும் உதவித் தொடக்கக் கல்வி அலுவலர்கள் கலந்து கொண்டு ஆலோசனைகள் வழங்க இயக்குனர் உத்தரவு.

பள்ளிகளில் திறந்த வெளி கிணறுகள் சரிசெய்ய வேண்டும்.தொடக்ககல்வி இயக்குநர் உத்தரவு

பள்ளியில் திறந்த வெளி கிணறுகள் ஆபத்தான வகையில் இருந்தால் அவற்றை சரி செய்ய நடவடிக்கை எடுக்க வேண்டும் என்று தொடக்கக் கல்வி இயக்குனர் தெரிவித்து உள்ளார். இதுகுறித்து தமிழக தொடக்கக் கல்வி இயக்குனர் வெளியிட்டுள்ள அறிக்கையில் கூறியிருப்பதாவது:–

பள்ளிகள் ஆய்வு ஊராட்சி ஒன்றியம், அரசு உதவி பெறும் தொடக்க மற்றும் நடுநிலைப் பள்ளிகளில் பயிலும் மாணவர்களின் கல்வித்தரத்தை மேம்படுத்தும் வகையில் உதவித் தொடக்கக் கல்வி அலுவலர்கள் ஆண்டு ஆய்வு, பள்ளிகள் பார்வை ஆகியவற்றை மேற்கொண்டு வருகின்றனர். அதன்படி ஜூன் மாதம் முதல் ஏப்ரல் மாதம் வரை மாதம் தோறும் 5 பள்ளிகளில் ஆண்டு ஆய்வும், 18 பள்ளிகள் பார்வையிட வேண்டும். இதில் செப்டம்பர், டிசம்பர் மற்றும் ஏப்ரல் மாதங்களில் மட்டும் 2 பள்ளிகளில் ஆண்டு ஆய்வும், 12 பள்ளிகள் பார்வையிட வேண்டும். ஆசிரியர்கள் பாராட்டு 2 ஆண்டுகளுக்கு மேலாக ஆண்டு ஆய்வு செய்யப்படாத பள்ளிகளுக்கு முன்னுரிமை அளிக்கப்படுவதுடன், ஆண்டு ஆய்வு தினத்தன்று நாள் முழுவதும் பள்ளியில் இருந்து துல்லியமாக ஆய்வு செய்து அறிக்கை தயாரிக்க வேண்டும்.

சிறப்பாக செயல்படும் ஆசிரியர்களை பாராட்டுவதுடன், நீண்ட நாட்களாக பள்ளிக்கு வராத மாணவர்களை பள்ளிக்கு அழைத்து வர நடவடிக்கை எடுக்க வேண்டும். பள்ளியின் கட்டமைப்பு, கணினி, தொலைக்காட்சி, கழிப்பறை, குடிநீர் மற்றும் நூலகப் பயன்பாடுகளையும் ஆய்வு செய்ய வேண்டும்.

உதவி பெறும் பள்ளிகள் பள்ளியில் திறந்த வெளிக் கிணறுகள், உயர் அழுத்த மின்கம்பங்கள் ஆபத்தான வகையில் இருந்தால் அவற்றை சரி செய்ய நடவடிக்கை மேற்கொள்ள வேண்டும். மாணவர்களுக்கான அனைத்து நலத்திட்டங்கள், கல்வி உதவித்தொகை உரிய நேரத்தில் சென்றடைகிறதா என்பதை உறுதி செய்ய வேண்டும்.

உதவி பெறும் பள்ளிகளையும் துல்லியமாக ஆய்வு செய்ய வேண்டும். பள்ளி பதிவேடுகள் பரிசீலிக்கப்படுவதுடன், குறைபாடுகள் கண்டறியப்பட்டால் அவற்றை களைய நடவடிக்கை எடுக்க வேண்டும். இவ்வாறு அவர் கூறி உள்ளார்.

பிளஸ் 2 மறுமதிப்பீடு,மறுகூட்டல் மதிப்பெண் ஒரிரு நாளில் வெளியீடு

தமிழகத்தில் பிளஸ் 2 மாணவர்களின் மறு மதிப்பீடு, மறு கூட்டல் மதிப்பெண்கள் தேர்வுத் துறை இணையதளத்தில் ஓரிரு நாளில் வெளியிடப்படும் என்று தேர்வுத் துறை அதிகாரிகள் தெரிவித்தனர். மறு கூட்டல், மறு மதிப்பீடு மதிப்பெண் குறித்த விவரத்தை மாணவர்கள் தெரிந்து கொள்வதற்கான இணையதள முகவரி விரைவில் வெளியிடப்படும் என்றும் அவர்கள் தெரிவித்தனர். பிளஸ் 2 தேர்வு முடிவுகள் கடந்த மே 7-ஆம் தேதி வெளியான நிலையில், விடைத்தாள்களை பதிவிறக்கம் செய்த லட்சத்துக்கும் அதிகமான மாணவர்களில், ஆயிரக்கணக்கானோர் மட்டுமே மறு கூட்டல், மறு மதிப்பீடு மதிப்பெண் பெற கடந்த ஜூன் 1-ஆம் தேதி வரை விண்ணப்பித்தனர்.

மாணவர்களின் மறு கூட்டல், மறு மதிப்பீடு மதிப்பெண்ணைத் தொகுக்கும் பணி முடிவடையும் நிலையில் உள்ளதால், திருத்தியமைக்கப்பட்ட மதிப்பெண் பட்டியல் தேர்வுத் துறையின் இணையதளத்தில் ஓரிரு நாளில் வெளியிடப்படும் என்று தேர்வுத் துறை அதிகாரிகள் தெரிவித்தனர். எம்.பி.பி.எஸ். - பி.இ. தேர்வுக் குழு: திருத்தியமைக்கப்பட்ட மாணவர்களின் மதிப்பெண்கள் அடங்கிய சி.டி., மருத்துவக் கல்வி தேர்வுக் குழு அதிகாரிகள், அண்ணா பல்கலைக்கழக மாணவர் சேர்க்கை அதிகாரிகளிடம் வெள்ளிக்கிழமை (ஜூன் 12) மாலை ஒப்படைக்கப்படும் என்று தெரிவித்தனர்.

புதிய தாற்காலிக மதிப்பெண் சான்றிதழ்: மறு கூட்டல், மறு மதிப்பீட்டுக்கு விண்ணப்பித்த மாணவர்களின் திருத்தி அமைக்கப்பட்ட மதிப்பெண் விவரங்கள் அரசின் "நிக்' மையத்துக்கு அனுப்பி வைக்கப்படும். பின்னர், அவர்களுக்கான தாற்காலிக புதிய மதிப்பெண் பட்டியல் தயாரிக்கப்பட்டு மாணவர்களுக்கு வழங்கப்படும். மதிப்பெண் மாற்றம் இருந்தால் மட்டுமே...: இணையதளம் மூலம் வெளியிடப்பட உள்ள மறு கூட்டல், மறு மதிப்பீடு மதிப்பெண் மாணவர் பட்டியலில், தங்களது பதிவு எண் இல்லாவிட்டால் உரிய பாடத்துக்குரிய விடைத்தாளில் எந்தவித மதிப்பெண் மாற்றமும் இல்லை என மாணவர்கள் தெரிந்து கொள்ளலாம்.

மதிப்பெண்களில் மாற்றம் உள்ளவர்கள், அறிவிக்கப்படும் நாளில் அரசுத் தேர்வுகள் மண்டலத் துணை இயக்குநர் அலுவலகங்களுக்குச் சென்று, தங்களது பழைய தாற்காலிக மதிப்பெண் சான்றிதழை ஒப்படைத்துவிட்டு, புதிய தாற்காலிக மதிப்பெண் சான்றிதழைப் பெற்றுக் கொள்ளலாம் எனவும் தேர்வுத் துறை வட்டாரங்கள் தெரிவித்தன.

பத்தாம் வகுப்பு அறிவியல் செய்முறை பதிவு

பத்தாம் வகுப்பு அறிவியல் செய்முறை பயிற்சி வகுப்பில் பங்கேற்க தனித்தேர்வர்கள், அந்தந்த மாவட்ட கல்வி அலுவலகத்தில் இம்மாத இறுதிக்குள் தங்கள் பெயரை பதிவு செய்யவேண்டும் என, அறிவுறுத்தப்பட்டுள்ளது. எதிர்வரும், 2015-16ம் கல்வியாண்டுக்கான பொதுத்தேர்வுகளில் செய்முறை பயிற்சியில் பங்கேற்காத மாணவர்களுக்கு அனுமதி வழங்கப்படாது.

நேற்று முதல் பெயர் பதிவுப்பணிகள் துவங்கப்பட்டுள்ளது.பதிவு பணிகள் முடிந்த பின், மாவட்ட கல்வி அலுவலரால் பள்ளிகள் ஒதுக்கீடு செய்யப்படும். அந்தமையங்களுக்கு தொடர்ந்து சென்று, அறிவியல் செய்முறை பயிற்சி வகுப்பில் பங்கேற்க வேண்டும். பயிற்சி வகுப்புகளில், 80 சதவீத வருகை பதிவு இருக்கவேண்டியது கட்டாயம். இதற்கான விண்ணப்பத்தை, www.tndge.in என்ற இணையதளத்தில் இருந்து பதிவிறக்கம் செய்து கொள்ளலாம்.

அரசு பள்ளிகளின் தரத்தை மேம்படுத்த உத்தரவு

அரசு பள்ளிகளின் தரத்தை மேம்படுத்தும் செயல்பாட்டில், கல்வியியல் ஆராய்ச்சி மற்றும் பயிற்சி நிறுவன விரிவுரையாளர்கள் ஈடுபட வேண்டும் என, உத்தரவிடப்பட்டு உள்ளது. இதுகுறித்து, மாநில கல்வியியல் ஆராய்ச்சி மற்றும் பயிற்சி நிறுவன இயக்கம் வெளியிட்டுள்ள அறிக்கை: ஆசிரியர் பயிற்சி நிறுவன கல்வியாளர்கள், அரசு பள்ளிகளை ஆய்வு செய்து, பள்ளி செயல்பாட்டில் உள்ள சிரமங்களை போக்க உதவ வேண்டும் என, மத்திய மனிதவள மேம்பாட்டுத் துறை வலியுறுத்தியுள்ளது.

இதன்படி, மாவட்ட ஆசிரியர் கல்வி மற்றும் பயிற்சி நிறுவன விரிவுரையாளர்கள், தங்களுக்கு ஒதுக்கப்பட்டுள்ள வட்டாரத்தில், ஒரு அரசு துவக்க அல்லது நடுநிலைப் பள்ளியை, தொடர்ந்து ஒரு பருவம் முழுவதும், மாதந்தோறும் பார்வையிட வேண்டும்; பள்ளி தரத்தை முன்னேற்றும் செயல்பாட்டில் ஈடுபட வேண்டும். இந்த பணியை முழுமையாக செயல்படுத்த, மாவட்ட ஆசிரியர் கல்வி மற்றும் பயிற்சி நிறுவன முதல்வர்கள், விரிவுரையாளர்களுக்கு அறிவுறுத்த வேண்டும்.

பயிற்சி நிறுவன முதல்வர்களும், வட்டாரத்தில் ஒரு பள்ளியை தேர்வு செய்து, இப்பணியை மேற்கொள்ள வேண்டும். இவ்வாறு, அதில் தெரிவிக்கப்பட்டு உள்ளது.

மகப்பேறு விடுப்பு அனுமதித்தல் சார்பான அரசு விளக்கக்கடிதம்

Click below

https://drive.google.com/file/d/0BwpC-9IEQAb7U19rWWpiT3liNlk/view

பணிப்பதிவேட்டினை பராமரித்தல் மற்றும் பதிவுகள் மேற்கொள்ளுதல் சார்பான அரசின் அறிவுரைகள்

Click below

http://cms.tn.gov.in/sites/default/files/gos/Lr%20No.185220001.pdf

ஆய்வக உதவியாளர் தேர்வு மாவட்ட வாரியாக கட் ஆப் மதிப்பெண்.கீ ஆன்சர் இல்லை

அரசுப் பள்ளி ஆய்வக உதவியாளர் தேர்வுக்கு மாவட்ட வாரியாக கட்ஆப் மதிப்பெண் நிர்ணயிக்கப்பட உள்ளது. அரசு மேல்நிலை மற்றும் உயர்நிலைப்பள்ளிகளில் காலியாகவுள்ள 4 ஆயிரத்து 362 ஆய்வக உதவியாளர் பணியிடங்களை நிரப்ப மே 31ல் எழுத்து தேர்வு நடத்தப்பட்டது. இத்தேர்வை 7 லட்சத்து 32 ஆயிரம் பேர் எழுதினர்.

விடைத்தாள் மதிப்பீட்டுக்கான ஆரம்பநிலை பணிகள் தற்போது நடந்து வருகின்றன. முதல் கட்டமாக எழுத்து தேர்வு அடிப்படையில் ஒரு காலியிடத்துக்கு 5 பேர் என்ற விகிதாச்சாரத்தில் நேர்காணலுக்கு விண்ணப்பதாரர்கள் தேர்வு செய்யப்படுவார்கள். மாவட்ட வாரியாக காலியிடங்கள் பட்டியல் அறிவிக்கப்பட்டுள்ளது. காலியிடங்கள் மாவட்ட அளவில் அறிவிக்கப்பட்டுள்ளதால் மாவட்ட வாரியாக கட்ஆப் நிர்ணயிக்கப்பட உள்ளது. குறிப்பிட்ட மாவட்டத்தில் அறிவிக்கப்பட்டுள்ள காலியிடங்களுக்கு ஏற்ப ஒரு காலியிடத்துக்கு 5 பேர் என்ற விகிதாச்சார அடிப்படையில் விண்ணப்பதாரர்கள் நேர்காணலுக்கு அனுமதிக்கப்படுவார்கள். கட்ஆப் மதிப்பெண் மாவட்டத்துக்கு மாவட்டம் வேறுபடும்.

குறிப்பிட்ட மாவட்டத்தில் உள்ள காலியிடங்களின் எண்ணிக்கை, அந்த மாவட்டத்தில் தேர்வெழுதியவர்களின் மதிப்பெண் நிலை ஆகியவற்றுக்கு ஏற்ப கட்ஆப் மதிப்பெண் அமைந்திருக்கும். தேர்வுத்துறை அலுவலர் ஒருவர் கூறுகையில், ‘‘ஏற்கனவே காலிப்பணியிடம் மாவட்ட வாரியாக அறிவிக்கப்பட்டுள்ளதால் விடைத்தாள் மதிப்பீட்டு பணி, கட்ஆப் மதிப்பெண் ஆகியவை மாவட்ட அளவிலேயே இருக்கும். ஒரு மாவட்டத்தில் குறிப்பிட்ட மதிப்பெண் எடுத்த ஒரு விண்ணப்பதாரர் நேர்காணலுக்கு தேர்வு செய்யப்பட்டிருப்பார். வேறு மாவட்டத்தில் இதே மதிப்பெண் பெற்ற தேர்வருக்கு நேர்காணல் வாய்ப்பு வராமல் போகலாம்.

இத்தேர்வுக்கு கீ ஆன்சர் எதுவும் வெளியிடப்படாது,’’ என்றார். எழுத்துத் தேர்வு மதிப்பெண்ணை கணக்கில் கொள்ளாமல், நேர்காணல் அடிப்படையிலேயே ஆய்வக உதவியாளர்களை தேர்வு செய்யும் பள்ளிக்கல்வித் துறையின் முடிவை எதிர்த்து, சென்னை உயர் நீதிமன்றத்தில் வழக்கு தொடரப்பட்டுள்ளது. இதுதொடர்பாக விளக்கம் அளிக்குமாறு பள்ளிக்கல்வித்துறைக்கு ஐகோர்ட் உத்தரவிட்டுள்ளது குறிப்பிடத்தக்கது.

மதுரை,கோவையில் நடந்த பிளஸ் 2தேர்வு விடைத்தாள் மறுமதிப்பீடு,மறுகூட்டல் முடிந்தது

மதுரை, கோவையில் நடந்த பிளஸ் 2 தேர்வு விடைத்தாள் மறுமதிப்பீடு, மறுகூட்டல் பணிகள் முடிவடைந்தன. பிளஸ் 2 தேர்வு முடிவுகள் மே மாதம் வெளியிடப்பட்டது. மாணவ, மாணவிகளுக்கு தற்காலிக மதிப்பெண் சான்றுகள் வழங்கப்பட்டன. மறுகூட்டல், விடைத்தாள் நகல் கோரி ஒரு லட்சம் விண்ணப்பங்கள் தேர்வுத்துறைக்கு வந்தன. வழக்கமாக, சென்னையில்தான் மறுமதிப்பீடு, மறுகூட்டல் செய்யப்படும்.

ஆனால் இந்த ஆண்டு சென்னையை தவிர்த்து மதுரை, கோவையில் சிறப்பு மையங்கள் அமைக்கப்பட்டு, மறுமதிப்பீடு, மறுகூட்டல் செய்யப்பட்டது. மாநில கல்வி ஆராய்ச்சி மற்றும் பயிற்சி மைய இணை இயக்குனர் அமுதவல்லி தலைமையில் ஆசிரியர்கள், ஊழியர்கள் சுமார் 600க்கும் மேற்பட்டோர் இப்பணியில் ஈடுபட்டனர். ஒவ்வொரு தாளும் 3 ஆசிரியர்களால் மதிப்பீடு செய்யப்பட்டது.

5 ஆயிரம் விடைத்தாள் மறுமதிப்பீடும், 4 ஆயிரம் விடைத்தாள் மறு கூட்டலும் செய்யப்பட்டன. கடந்த 7ம் தேதி பணிகள் அனைத்தும் முடிவடைந்தன. இதுகுறித்த விவரம் தேர்வுத்துறையிடம் ஒப்படைக்கப்படும் என அமுதவல்லி கூறியுள்ளார்.