மொபைல் போனில் வாக்காளர் விபரம்

வாக்காளர் பட்டியலில் இணைக்க, ஆதார் எண் வழங்கியவர்களுக்கு, அவர்கள் குறித்த விவரம், அடுத்த வாரம் முதல், மொபைல் போனில் தெரிவிக்கப்படும்' என, தமிழக தலைமை தேர்தல் அதிகாரி சந்தீப் சக்சேனா தெரிவித்தார். இதுகுறித்து, அவர் கூறியதாவது:

வாக்காளர் பட்டியலை செம்மைப்படுத்த, வாக்காளர்களின் ஆதார் எண், மொபைல் எண், இ - மெயில் முகவரி போன்ற விவரங்கள் சேகரிக்கும் பணி, மார்ச்சில் துவக்கப்பட்டு, மே மாதம் முடிக்கப்பட்டது. ஆதார் எண்:தமிழகத்தில், 2.79 கோடி வாக்காளர்கள், ஆதார் எண் வழங்கி உள்ளனர். இவ்விவரம் கணினியில் பதவிவேற்றம் செய்யப்பட்டு, ஆதார் எண் விவரங்களுடன், ஒப்பிட்டு பார்க்கப்பட்டு உள்ளது.

இவ்விவரங்கள், சம்பந்தப்பட்ட வாக்காளர்களுக்கு, எஸ்.எம்.எஸ்., இ - மெயில், மொபைல் 'ஆப்ஸ்' மூலம் தெரிவிக்கப்படும்.இ - மெயில் தகவலுடன், வாக்காளர் பட்டியல் இணைப்பு வழங்கப்படும். வாக்காளர் தங்கள் பெயர் மற்றும் விவரங்களை, அதில் பார்த்துக் கொள்ளலாம். தவறு இருந்தால், அவர்கள் இ - மெயில், எஸ்.எம்.எஸ்., மூலம் தெரிவிக்கலாம்; உடனடியாக அவை சரி செய்யப்படும். தமிழகத்தில், கடந்த மாதம், 30ம் தேதி வரை, வாக்காளர் பட்டியலில் பெயர் சேர்க்க கோரி, 9.61 லட்சம் விண்ணப்பங்கள் வந்தன. இவற்றில், 9.25 லட்சம் விண்ணப்பங்கள் ஏற்றுக் கொள்ளப்பட்டன; 31 ஆயிரம் மனுக்கள் நிராகரிக்கப்பட்டு உள்ளன.பெயர் நீக்க கோரி, 1.62 லட்சம் விண்ணப்பங்கள் பெறப்பட்டன. இதில், 1.59 லட்சம் விண்ணப்பங்கள் ஏற்றுக் கொள்ளப்பட்டன; 12 ஆயிரம் விண்ணப்பங்கள் நிராகரிக்கப்பட்டு உள்ளன. திருத்தம் மேற்கொள்ள, 3.86 லட்சம் விண்ணப்பங்கள் பெறப்பட்டன. இதில், 3.75 லட்சம் விண்ணப்பங்கள் ஏற்கப்பட்டு, 10 ஆயிரம் விண்ணப்பங்கள் நிராகரிக்கப்பட்டு உள்ளன.

பரிசீலனை:முகவரி மாற்றக் கோரி, 1.41 லட்சம் விண்ணப்பங்கள் பெறப்பட்டன. இதில், 1.28 லட்சம் விண்ணப்பங்கள் ஏற்கப்பட்டு, 12 ஆயிரம் விண்ணப்பங்கள் நிராகரிக்கப்பட்டு உள்ளன. மற்ற விண்ணப்பங்கள் பரிசீலனையில் உள்ளன.பெயர் நீக்க வந்துள்ள விண்ணப்பங்கள், சம்பந்தப்பட்ட வாக்காளரின் குடும்பத்தில் இருந்து பெறப்பட்டு உள்ளது. வரைவு வாக்காளர் பட்டியல் தயாரிப்புக்கு முன், பெயர் நீக்கம் செய்யப்படும். வாக்காளர் பட்டியலில், புதிதாக சேர்க்கப்படுவோருக்கு, உடனடியாக, வண்ண வாக்காளர் அடையாள அட்டை வழங்கப்படும். இவ்வாறு, அவர் தெரிவித்தார்.

மத நல்லிணக்க கட்டுரைப் போட்டி

மாணவர்கள் மத்தியில், ஜாதி, மத மோதல்களைத் தவிர்க்கும் வகையில், 'தேசிய ஒற்றுமை மற்றும் மத நல்லிணக்கம்' என்ற தலைப்பில், கட்டுரைப் போட்டி நடத்த, அரசுப் பள்ளிகளுக்கு கல்வித்துறை உத்தரவிட்டு உள்ளது.அனைத்து மாநில அரசு, அரசு உதவிபெறும் மற்றும் தனியார் பள்ளிகளில், மத நல்லிணக்க கட்டுரைப் போட்டி நடத்த, மத்திய உள்துறை அமைச்சகம் உத்தரவிட்டு உள்ளது.இதையடுத்து, தமிழகத்திலுள்ள அரசு, அரசு உதவிபெறும் பள்ளிகளில், 'தேசிய ஒற்றுமை மற்றும் மத நல்லிணக்கம்' என்ற பெயரில், கட்டுரைப் போட்டி நடத்த அறிவுறுத்தப்பட்டு உள்ளது.

பள்ளிகளில் மாணவர்கள் அளவில், ஆக., 14ல், போட்டி நடத்தப்படும். இதில் வெற்றி பெறுவோருக்கு பரிசும், பாராட்டு சான்றிதழும் வழங்கப்படும். இந்தப் போட்டிகளில், 9ம் வகுப்பு முதல், பிளஸ் 2 வரை படிக்கும் மாணவ, மாணவியர் பங்கேற்கலாம்.

ஒற்றுமை மற்றும் மத நல்லிணக்கத்தை சீர்குலைக்கும் விஷயங்கள், மக்களிடம் ஒற்றுமையை உருவாக்குவது போன்ற தகவல்கள் அடிப்படையில், கட்டுரை எழுத, மாணவ, மாணவியருக்கு ஆசிரியர்கள் உத்தரவிட்டு உள்ளனர்

ஆசிரியர் பயிற்சி படிப்புக்கு இரண்டாம் கட்ட சேர்க்கை அறிவிப்பு

ஆசிரியர் பயிற்சி நிறுவனங்களில், 90 சதவீத இடங்கள் காலியாக இருப்பதால், இரண்டாம் கட்ட மாணவர் சேர்க்கை அறிவிக்கப்பட்டுள்ளது.தமிழகத்தில், மாநிலக் கல்வியியல் மற்றும் ஆராய்ச்சி நிறுவனத்தின் கட்டுப்பாட்டில், 600 டிப்ளமோ ஆசிரியர் பயிற்சி நிறுவனங்கள் செயல்படுகின்றன. இவற்றில், 15 ஆயிரம் இடங்கள் உள்ளன. இந்தக் கல்வி ஆண்டுக்கான மாணவர் சேர்க்கையில், 10 சதவீத இடங்கள் மட்டுமே நிரம்பின. இதையடுத்து, இரண்டாம் கட்ட மாணவர் சேர்க்கை அறிவிக்கப்பட்டுள்ளது.

இரண்டாம் கட்ட கவுன்சிலிங் ஆகஸ்ட், 7ம் தேதி நடக்கிறது. இதற்கான விண்ணப்பத்தை, நாளை முதல் இம்மாதம் 31ம் தேதி வரை கொடுக்கலாம். விண்ணப்பங்களை, மாவட்ட ஆசிரியர் கல்வி மற்றும் ஆராய்ச்சி நிறுவனங்களில் பெற்றுக் கொள்ளலாம் என, மாநிலக் கல்வியியல் மற்றும் ஆராய்ச்சி நிறுவன இயக்குனர் ராமேஸ்வர முருகன் தெரிவித்துள்ளார்.

RMSA புதிய இணை இயக்குநர்

அனைவருக்கும் இடைநிலைக் கல்வி திட்டத்துக்கு புதிய இணை இயக்குநர் அனைவருக்கும் இடைநிலைக் கல்வித் திட்டத்துக்கு புதிய இணை இயக்குநர் நியமிக்கப்பட்டுள்ளார். இதுவரை அந்தப் பொறுப்பில் இருந்த பி.ஏ. நரேஷ், பள்ளிக் கல்வித் துறையின் இணை இயக்குநராக (இடைநிலைக் கல்வி) மாற்றப்பட்டுள்ளார். வேலூர் மாவட்ட முதன்மைக் கல்வி அலுவலராக இருந்த குமார், அனைவருக்கும் இடைநிலைக் கல்வித் திட்ட இணை இயக்குநராக பதவி உயர்வு பெற்றுள்ளார். நாமக்கல், தஞ்சாவூர் உள்ளிட்ட மாவட்டங்களிலும் இவர் முதன்மைக் கல்வி அலுவலராகப் பணியாற்றியுள்ளார்.

தமிழகத்தில் பள்ளிகள்:ஒரு புள்ளி விபரம்

* தமிழகத்தில் அரசு பள்ளி மற்றும் அரசு உதவி பெறும் பள்ளிகள் 45,366 உள்ளன.
* இப்பள்ளிகளில் 87,68,231 மாணவ, மாணவிகள் கல்வி பயில்கின்றனர்.

* தமிழக அரசு சார்பில் அரசு மற்றும் அரசு உதவி பெறும் பள்ளிகளில் படிக்கும் மாணவ, மாணவிகளுக்கு 14 இலவச திட்டம் அறிவிக்கப்பட்டு, நடைமுறைப்படுத்தப்பட்டு வருகிறது. இதில், முக்கியமானது இலவச பாடநூல்.

* 1 முதல் 9ம் வகுப்பு வரை படிக்கும் மாணவ, மாணவிகளுக்கு முப்பருவ கல்வி முறையில் தமிழ், ஆங்கிலம், கணிதம், அறிவியல், சமூக அறிவியல் ஆகிய 5 பாட புத்தகம் ஆண்டுக்கு மூன்று முறை வழங்கப்படுகிறது.

* 10, 11, 12ம் வகுப்பு மாணவ, மாணவிகளுக்கு ஜூன் மாதம் ஒரே தவணையாக 6 பாட புத்தகங்களும் வழங்கப்படுகின்றன. தமிழ், ஆங்கிலம் பாடத்துக்கு தலா ஒரு துணை பாடநூல் வழங்கப்படுகிறது.

ப்ளே ஸ்கூல் திருத்திய வழிமுறைகள் வெளியீடு

ப்ளே ஸ்கூல்' நடத்துவதற்கான, திருத்திய விதிமுறைகளை, தமிழக அரசு வெளியிட்டுஉள்ளது.தமிழகத்தில், ப்ளே ஸ்கூல் புற்றீசல் போல் அதிகரித்து வருகிறது. இவற்றை ஒழுங்குபடுத்துவதற்காக, தமிழக அரசு புதிய விதிமுறைகளை அறிவித்தது. இது தொடர்பாக, பொதுமக்களிடம் கருத்து கேட்கப்பட்டது. பொதுமக்கள் தெரிவித்த கருத்துக்கள் அடிப்படையில், புதிதாக திருத்திய விதிமுறைகளை, அரசு அறிவித்துள்ளது.முன், ப்ளே ஸ்கூல் விதிமுறையில், 'ப்ரி கே.ஜி.,' வகுப்பு மட்டும் சேர்க்கப்பட்டிருந்தது. தற்போது, புதிதாக, எல்.கே.ஜி., - யு.கே.ஜி., நடத்தவும், அனுமதி அளிக்கப்பட்டு உள்ளது.

மேலும்,
*ப்ளே ஸ்கூல் வகுப்பறைகளில், கண்காணிப்பு கேமரா பொருத்த வேண்டும்.
*குடிநீர் வசதி, கழிப்பறை வசதி ஏற்படுத்த வேண்டும்.
*அறைகளை துாய்மையாக வைத்திருக்க வேண்டும்.
*மாணவர், 15 பேருக்கு, ஒரு ஆசிரியர் நியமிக்கப்பட வேண்டும்.
*தகுதி வாய்ந்த ஆசிரியைகளை மட்டும் நியமிக்க வேண்டும்.
*ஒவ்வொரு வகுப்பிற்கும், இரண்டு வழிகள் இருக்க வேண்டும். *வகுப்பறைகள் தரைதளத்தில் மட்டும் இருக்க வேண்டும். இவ்வாறு, அரசு விதிமுறைகளில் தெரிவிக்கப்பட்டுள்ளது.திருத்திய விதிமுறைகளை, அரசு இணையதளத்தில் (tn.gov.in) பார்வையிடலாம்.

மாணவர் சேர்க்கையில் மாற்றம் பொறியியல் பட்டதாரிகளும் பி.எட் படிப்பில் சேரலாம்

*2015-16 ல் வழிகாட்டு நெறிமுறையில் பி.இ,பி.டெக் பட்டதாரிகளும் பி.எட் படிப்புக்கு விண்ணப்பிக்க தகுதியுடையவர் எனக் கூறப்பட்டுள்ளது.

*அறிவியல் (இயற்பியல்,வேதியியல்,கணித ) பாடத்தின் கீழ் விண்ணப்பிக்கலாம்

*பி.இ பட்டதாரிகளுக்கு வேலைவாய்ப்பு குறைந்துவருவதை கருத்தில் கொண்டு இந்த வாய்ப்பு வழங்கப்படுகிறது

*ஓரிரு வாரங்களில் விண்ணப்பம் விநியோகிக்கப்படும்

IGNOU B.ed anounced-prospect as

Click below

http://ignou.ac.in/userfiles/Prospectus%20BED%202016%20English%20Corrected%206.pdf

செப் 2 வேலை நிறுத்த போராட்டத்தில் ஆரம்பப்பள்ளி ஆசிரியர் கூட்டணி கலந்து கொள்ளும்

தமிழகம் ஆசிரியர் கூட்டமைப்பு குற்றச்சாட்டு:1200 பள்ளிகளை மூட தமிழக அரசு முயற்சி பதிவு செய்த நேரம்:2015-07-19 02:23:55 திண்டுக்கல்: திண்டுக்கல்லில் நேற்று தமிழ்நாடு ஆரம்ப பள்ளி ஆசிரியர் கூட்டமைப்பின் சார்பில் போராட்ட ஆயத்த கூட்டம் நடந்தது. கூட்ட முடிவில் மாநில பொதுச்செயலாளர் பாலசுந்தர் நிருபர்களிடம் கூறியதாவது:

புதிய பென்ஷன் திட்டத்தை ரத்து செய்ய வேண்டும் என்பது உள்ளிட்ட 15 கோரிக்கைகளை வலியுறுத்தி சென்னையில் ஆக.1ல் தொடர் முழக்க போராட்டம் நடைபெற உள்ளது. இதில் ஆரம்பப்பள்ளிகளை சேர்ந்த 5 ஆயிரத்துக்கும் மேற்பட்ட ஆசிரியர்கள் கலந்து கொள்வர். தேவையான பணியிடங்களை நிரப்பிய பின்னரே உபரி பணியிடங்களில் கவனம் செலுத்த வேண்டும்.

இடைக்கால மாறுதல் வழங்குவதில் அமைச்சர்கள் தலையீட்டை தவிர்க்க வேண்டும். ஒளிவு மறைவின்றி கலந்தாய்வு மாறுதல் நடத்த வேண்டும். சுயநிதி பள்ளிகளுக்கு வரைமுறையில்லாமல் அனுமதி வழங்கி வருகின்றனர். அதே நேரம் 1200க்கும் மேற்பட்ட அரசு பள்ளிகளை முட அதிமுக அரசு முயற்சித்து வருகிறது. தேர்தலின் போது ஆசிரியர் சங்கங்களுக்கு அளித்த வாக்குறுதிகளை இதுவரை நிறைவேற்றவில்லை. செப்.2ல் நடைபெறவுள்ள அகில இந்திய வேலைநிறுத்தத்தில் ஆரம்ப பள்ளி ஆசிரியர்களும் கலந்து கொள்வர். இவ்வாறு அவர் தெரிவித்தார்.

பி.எட் படிப்பில் சேர புதிய வழிமுறைகள்

தேசிய ஆசிரியர் கல்வியியல் கவுன்சில் சார்பில், பி.எட்., - எம்.எட்., - பி.பி.எட்., போன்ற படிப்புகளுக்கு, புதிய விதிமுறைகள் கொண்டு வரப்பட்டன. இந்த விதிகளின் படி, அனைத்து ஓராண்டு ஆசிரியர் பட்டப் படிப்புகளும், இரண்டு ஆண்டு படிப்பாக மாற்றப்பட்டுள்ளன. பாடத்திட்டமும் புதிதாக தயாரிக்கப்பட்டுள்ளது.

புதிதாக கணினி அறிவியல், யோகா, விளையாட்டு போன்ற பல பாடங்கள் சேர்க்கப்பட்டுள்ளன. இந்த விதிமுறைகள் தமிழகத்தில் அமல்படுத்தக்கூடாது என்று, ஆசிரியர் கல்வியியல் கல்லுாரிகள் சார்பில், உயர் நீதிமன்றத்தில் வழக்குத் தொடரப்பட்டு, நிலுவையில் உள்ளது.இந் நிலையில், மத்திய அரசின் தேசிய ஆசிரியர் கல்வியியல் கவுன்சில் பிறப்பித்த உத்தரவில், அனைத்து மாநிலங்களும், புதிய விதிமுறைகளை, புதிய கல்வி ஆண்டில் கண்டிப்பாக செயல்படுத்த வேண்டும் என, எச்சரித்துள்ளது. இதன்படி, தமிழகத்தில் இந்த ஆண்டு, 690 கல்லுாரிகளுக்கு இரண்டாண்டு படிப்புக்கு அனுமதி வழங்கியுள்ளது. இரண்டாண்டு ஆசிரியர் படிப்பு, இந்தாண்டு முதல் அமலாகும்; புதிய விதிமுறைகளை அமல்படுத்த வேண்டுமென்றும், தமிழக அரசு, தமிழக ஆசிரியர் கல்வியியல் பல்கலைக்கு கடிதம் அனுப்பியுள்ளது.

இதைத் தொடர்ந்து, அனைத்து கல்லுாரிகளுக்கும், ஆசிரியர் கல்வியியல் பல்கலை துணைவேந்தர் விஸ்வநாதன், அவசரக் கடிதம் ஒன்றை அனுப்பியுள்ளார். அதில், 'வரும் புதிய கல்வி ஆண்டு முதல் அனைத்து கல்வியியல் கல்லுாரிகளும், மத்திய அரசின், 2014 புதிய விதிமுறைகளைக் கண்டிப்பாக பின்பற்ற வேண்டும். உயர் நீதிமன்ற உத்தரவின்படி, இந்த உத்தரவு மாறுபடும்' என, தெரிவிக்கப்பட்டுள்ளது.

அங்கீகாரமின்றி செயல்படும் பள்ளிகளை மூட வலியுறுத்தல்

விதிமுறைகளுக்கு கட்டுப்படாமல் அங்கீகாரமின்றி இயங்கும் சுயநிதி மெட்ரிக் பள்ளிகளை மூட வேண்டும்' என, தமிழ்நாடு ஆரம்பப் பள்ளி ஆசிரியர் கூட்டணி நிர்வாகிகள் கூட்டத்தில் வலியுறுத்தப்பட்டது. திண்டுக்கல்லில் நடந்த இக்கூட்டத்திற்கு மாநில தலைவர் மோசஸ் தலைமை வகித்தார். பொதுச் செயலாளர் பாலசந்தர், பொருளாளர் ஜீவானந்தம் வரவேற்றனர்.

மோசஸ் கூறியதாவது: கடந்த வாரம் ஆசிரியர்களுக்கான பொது மாறுதல் கலந்தாய்வு துவங்கியது. ஏற்கனவே ஓராண்டு பணியில் உள்ள ஆசிரியர்களும் இதில் பங்கேற்கலாம் என அறிவிக்கப்பட்டது. ஆனால் தற்போது 3 ஆண்டுகள் பணிபுரிந்து இருந்தால் மட்டுமே பங்கேற்க முடியும் என தெரிவிப்பது வேதனையளிக்கிறது. அரசியல் தலையீடின்றி ஒளிவு மறைவற்ற கலந்தாய்வு நடத்த வேண்டும். தமிழகத்தில் 20 ஆண்டுகளாக பல பெற்றோரை ஏமாற்றி, அங்கீகாரமின்றி பலஆயிரம் சுயநிதி மெட்ரிக் பள்ளிகள் துவக்கப்பட்டுள்ளன. அங்கீகாரம் இல்லாத மெட்ரிக் பள்ளிகளை மூட அரசு நடவடிக்கை எடுக்க வேண்டும்.

குறைந்தது 10 மாணவர்கள் விரும்பினால் ஆங்கிலவழி கல்வி கற்பிக்கப்படும் எனக்கூறி, அரசு பள்ளிகளில் ஆங்கில வழி கல்வி ஆரம்பிக்கப்பட்டது. இதன்படி 3,500 பள்ளிகளில் ஆங்கில வழி கல்வி அறிமுகமானது. ஆனால் பெரும்பாலான பள்ளிகளில் ஆங்கிலவழி கல்வியையும் பிறஆசிரியர்களே கற்பிக்கின்றனர். எனவே, ஆங்கில வழிக் கல்வி ஆசிரியர் காலிப் பணியிடங்களை உடனடியாக நிரப்ப வேண்டும், என்றார்.

Dist level BRC master training

குரூப் 2முதன்மை தேர்வு ஹால்டிக்கெட் ஓரிரு நாளில் வெளியீடு

குரூப் 2 பதவியில் அடங்கிய 1,241 பணியிடங்களை நிரப்புவதற்கான முதன்மை எழுத்து தேர்வு வரும் 26ம் தேதி நடக்கிறது. சுமார் 6.2 லட்சம் பேர் எழுதுகின்றனர். தமிழ்நாடு அரசு பணியாளர் தேர்வாணையம் (டிஎன்பிஎஸ்சி) குரூப் 2 பதவியில் (நேர்முக தேர்வு உடையது) அடங்கிய 8 உதவி வணிக வரி அதிகாரி, சார்பதிவாளர் கிரேடு 2 (காலி பணியிடம் 23), ஜூனியர் எம்ப்ளாய்மென்ட் அதிகாரி (18), லோக்கல் பண்ட் ஆடிட் டிபார்ட்மென்ட் உதவி ஆய்வாளர் (78), இந்து சமய அறநிலையத்துறை ஆடிட்டிங் ஆய்வாளர் (28), கூட்டுறவுத்துறை சீனியர் இன்ஸ்பெக்டர் (333), வேளாண்மை துறை மார்க்கெட்டிங் ஜூனியர் கண்காணிப்பாளர் (72), வருவாய் உதவியாளர் (618) உள்ளிட்ட 18 வகையான பதவிகளில் அடங்கிய 1,241 காலி பணியிடங்களை நிரப்புவதற்கான அறிவிப்பை கடந்த மார்ச் 30ம் தேதி வெளியிட்டது. அன்றைய தினமே தேர்வுக்கு ஆன்லைன் மூலம் விண்ணப்பிக்கும் பணி தொடங்கியது.

இதற்காக, விண்ணப்பிக்க மே 29ம் தேதி கடைசி நாள் என்றும் அறிவிக்கப்பட்டிருந்தது. இத்தேர்வுக்கு போட்டிப்போட்டு பட்டதாரிகள் விண்ணப்பித்துள்ளனர். மொத்தம் 6 லட்சத்து 20 ஆயிரத்து 292 பேர் விண்ணப்பித்துள்ளனர். இவர்களுக்கான முதன்மை தேர்வு வரும் 26ம் தேதி நடக்கிறது. தமிழகம் முழுவதும் மொத்தம் 114 மையங்களில் இந்த எழுத்து தேர்வு நடக்கிறது. காலை 10 மணிக்கு தொடங்கும் தேர்வு பிற்பகல் 1 மணி வரை நடைபெறுகிறது. தேர்வுக்கு மொத்தம் 300 மதிப்பெண்களுக்கு வினாக்கள் கேட்கப்படும். பொது அறிவு (டிகிரி தரம்) 150 மதிப்ெபண்ணும், பொது தமிழ் அல்லது பொது ஆங்கிலத்தில் 150 மதிப்பெண்ணுக்கும் வினாக்கள் கேட்கப்படும்.

இத்தேர்வில் தேர்ச்சி பெறுவோர் மெயின் தேர்வுக்கு அழைக்கப்படுவார்கள். அதன் பிறகு அவர்களுக்கு நேர்முக தேர்வு நடத்தப்பட்டு பணி நியமன ஆணை வழங்கப்படும். இத்தேர்வுக்கான ஹால் டிக்கெட் இன்னும் ஓரிரு நாட்களில் டிஎன்பிஎஸ்சி இணையதளத்தில் வெளியிடப்படும் என்று அதிகாரிகள் தெரிவித்தனர்

பி.எட் சேர்க்கை நடைமுறைகள் வெளியீடு

நிகழ் கல்வியாண்டுக்கான ( 2015-16) பி.எட். சேர்க்கை நடைமுறைகள் வெளியிடப்பட்டுள்ளன. அதன்படி, பயன்பாட்டு வேதியியல் (அப்ளைடு கெமிஸ்ட்ரி) துறையில் இளநிலை பட்டப் படிப்பு முடித்தவர்களும் பி.எட். படிக்க விண்ணப்பிக்கலாம் என்று தெரிவிக்கப்பட்டுள்ளது. தமிழ்நாடு ஆசிரியர் கல்வியியல் பல்கலைக்கழக இணையதளத்தில் இந்த நடைமுறைகள் இடம் பெற்றுள்ளன.

கணிதம், பயன்பாட்டு கணிதம், இயற்பியல், பயன்பாட்டு இயற்பியல், புவி இயற்பியல், உயரி இயற்பியல், மின்னணுவியல், வேதியியல், பயன்பாட்டு வேதியியல், தாவரவியல், விலங்கியல், உயிரித் தொழில்நுட்பம், தாவர உயிரியல், தாவர உயிரித் தொழில்நுட்பம், சுற்றுச்சூழல் அறிவியல், நுண் உயிரியல், வரலாறு, புவியியல், பயன்பாட்டு புவியியல், கணினி அறிவியல், தகவல் தொழில்நுட்பம், கணினி அப்ளிகேஷன்ஸ் உள்ளிட்ட துறைகளில் இளநிலை பட்டங்களை முடித்தவர்கள் பி.எட். படிப்புக்கு விண்ணப்பிக்கலாம். ஓ.சி. பிரிவினர் குறைந்தபட்சம் 50 சதவீத மதிப்பெண்ணும், பி.சி, பி.சி.எம். பிரிவினர் குறைந்தபட்சம் 45 சதவீதமும், எம்.பி.சி. பிரிவினர் 43 சதவீதமும், எஸ்.சி, எஸ்.டி, எஸ்சிஏ பிரிவினர் குறைந்தபட்சம் 40 சதவீத மதிப்பெண்ணும் பெற்றிருப்பது அவசியம்.

பொருளாதாரம், வணிகவியல், மனை அறிவியல், அரசியல் அறிவியல், சமூகவியல், உளவியல், தத்துவவியல், இந்திய கலாசாரம் உள்ளிட்ட துறைகளில் குறைந்தபட்சம் 50 சதவீத மதிப்பெண்களுடன் முதுநிலை பட்டப் படிப்பு முடித்தவர்களும் பி.எட். படிக்க விண்ணப்பிக்கலாம். இதுவரை ஓராண்டாக இருந்துவந்த பி.எட். படிப்புக் காலம், தேசிய ஆசிரியர் கல்வி கவுன்சிலின் (என்.சி.டி.இ.) வழிகாட்டுதலின்படி இரண்டு ஆண்டுகளாக உயர்த்தப்பட்டுள்ளது குறிப்பிடத்தக்கது.

ஆசிரியர் நியமனத்தில் பள்ளிகளுக்கு கட்டுப்பாடு

அரசு உதவிபெறும் பள்ளிகளில் ஆசிரியர்கள் நியமனத்தில் மாற்றுத்திறனாளிகளுக்கு இடஒதுக்கீடு வழங்க வேண்டுமென கல்வித்துறை உத்தரவிட்டுள்ளது. அரசு மற்றும் உதவி பெறும் பள்ளிகளில் தகுதி தேர்வில் தேர்வு பெற்றோர் ஆசிரியர்களாக நியமிக்கப்பட்டு வருகின்றனர். இதில் அரசு பள்ளிகளில் மட்டும் மாற்றுத்திறனாளிகள் நியமிக்கப்பட்டனர்.

அரசு உதவிபெறும் பள்ளிகளில் மாற்றுத்திறனாளிகளை நியமிப்பதில்லை என, புகார் எழுந்தது. இதையடுத்து அரசு உதவி பெறும் பள்ளிகளில் ஆசிரியர்கள் நியமனத்தில் தகுதி்தேர்வில் தேர்வு பெற்ற மாற்றுத்திறனாளிகளுக்கு இடஒதுக்கீடு வழங்க வேண்டும். பணியிடம் ஒப்புதல் கிடைக்கும் வரை காலியிடங்களில் பெற்றோர் ஆசிரியர் கழகம் மூலம் மாற்றுத்திறனாளி ஆசிரியர்களை நியமிக்க வேண்டுமென, கல்வித்துறை உத்தரவிட்டுள்ளது.

6.15 இலட்சம் மாணவர்களுக்கு இலவச சைக்கிள்

நடப்பு கல்வியாண்டில், 6.15 லட்சம் மாணவர்களுக்கு, இலவச சைக்கிள் வழங்கும் திட்டத்தை, முதல்வர் ஜெயலலிதா, துவக்கி வைத்தார்.தமிழகத்தில், 2005 - 06 முதல், அரசு மற்றும் அரசு உதவி பெறும் பள்ளிகளில், 11ம் வகுப்பு படிக்கும், அனைத்து பிரிவு மாணவ, மாணவியருக்கும், இலவச சைக்கிள் வழங்கப்படுகிறது.

நடப்பு கல்வியாண்டில், 223.17 கோடி ரூபாய் செலவில், 11ம் வகுப்பு படிக்கும், 2.73 லட்சம் மாணவர், 3.41 லட்சம் மாணவியர் என, மொத்தம், 6.15 லட்சம் பேருக்கு இலவச சைக்கிள் வழங்கப்பட உள்ளது.இத்திட்டத்தை முதல்வர் ஜெயலலிதா, தலைமைச் செயலகத்தில் நேற்று துவக்கி வைத்து, ஐந்து மாணவருக்கு, இலவச சைக்கிள்கள் வழங்கினார்.இந்நிகழ்ச்சியில், அமைச்சர்கள் சுப்ரமணியன், வீரமணி, அப்துல் ரஹீம் மற்றும் அதிகாரிகள், கலந்து கொண்டனர்.

பள்ளி மாணவர் மூலம் நோய் விழிப்புணர்வு

பள்ளி மாணவர் உதவியுடன், தொற்று நோய் குறித்து, மக்கள் இடையே, விழிப்புணர்வு ஏற்படுத்த, உள்ளாட்சி அமைப்புகள் நடவடிக்கை மேற்கொண்டுள்ளன. தமிழகத்தில் டெங்கு, பன்றிக் காய்ச்சல் போன்ற தொற்று நோய்கள் பரவுவதை தடுக்க, பள்ளி மாணவர்கள் மூலம், அவர்களின் பெற்றோரிடம் விழிப்புணர்வு ஏற்படுத்த, உள்ளாட்சி அமைப்புகள், நடவடிக்கை மேற்கொண்டுள்ளன.

இதற்காக, சுகாதார உறுதிமொழி விண்ணப்பப் படிவம் தயார் செய்யப்பட்டு உள்ளது. இதை மாணவர்களிடம் வழங்கி, அவர்களின் பெற்றோரிடம் கையெழுத்து வாங்கி வரும்படி வலியுறுத்தப்படுகிறது.இதன் மூலம், அப்படிவத்தில் உள்ள கருத்துகளை, மாணவர்களும், பெற்றோரும் அறிந்து கொள்வர். அவர்களும் சுகாதார நடவடிக்கையில் ஈடுபடுவர் என, உள்ளாட்சி அதிகாரிகள் நம்புகின்றனர்.எனவே, தமிழகம் முழுவதும், இப்பணியை மேற்கொள்ள, உள்ளாட்சி அமைப்புகளுக்கு உத்தரவிடப்பட்டு உள்ளது.

NMMS exam results 2014

Click below

http://doozystudy.blogspot.in/2015/07/nmms-2014-exam-results.html

பாடநூல் கல்வியியல் செயலாளராக திரு.கார்மேகம் பொறுப்பேற்பு

தமிழ்நாட்டுப் பாடநூல், கல்வியியல் பணிகள் கழகத்தின் செயலாளராக எஸ்.கார்மேகம் புதன்கிழமை பொறுப்பேற்றார். பள்ளிக் கல்வி (இடைநிலை) இணை இயக்குநராக இருந்த அவர், இயக்குநராகப் பதவி உயர்வு பெற்றுள்ளார். இதையடுத்து, பள்ளிக் கல்வி இயக்குநர் அளவிலான தமிழ்நாட்டுப் பாடநூல், கல்வியியல் பணிகள் கழக செயலாளராக அவர் நியமிக்கப்பட்டுள்ளார். அனைவருக்கும் இடைநிலைக் கல்வித் திட்ட இணை இயக்குநர், மெட்ரிக் பள்ளிகள் இணை இயக்குநர், சேலம் மாவட்ட முதன்மைக் கல்வி அலுவலர் உள்ளிட்ட பல்வேறு பொறுப்புகளையும் அவர் முன்னதாக வகித்துள்ளார்.

கோவை மாவட்ட ஆசிரியர்களுக்கு மற்றும் மாணவர்களுக்காக புதிய இணையதளம்

கோவை மாவட்டத்தில் உள்ள ஆசிரியர்களுக்காகவும், மாணவர்களுக்காகவும், நிர்வாக வசதிக்காகவும் பள்ளிக் கல்வித் துறை சார்பில் புதிய இணையதளம் (www.kovaischools.net) தொடங்கப்பட்டுள்ளது. தமிழக பள்ளிக் கல்வித் துறை சார்பில் மாநிலம் முழுவதிலும் உள்ள அரசுப் பள்ளிகள், மாணவர்கள், ஆசிரியர்களின் விவரங்கள், மாணவர்கள் - ஆசிரியர்களுக்கான நலத் திட்டங்கள் உள்ளிட்ட விவரங்கள் அடங்கிய இணையதளம் (https:tnschools.gov.in) செயல்பட்டு வருகிறது.

இந்த நிலையில், கோவை மாவட்டத்தில் செயல்பட்டு வரும் அரசு, அரசு உதவி பெறும் பள்ளிகளின் விவரங்கள், மின்னஞ்சல் முகவரி, கல்வி அதிகாரிகளின் விவரங்கள் அடங்கிய புதிய இணையதளத்தை மாவட்ட பள்ளிக் கல்வித் துறை வடிவமைத்துள்ளது. இந்த இணையதளத்தை மாவட்ட ஆட்சியர் அர்ச்சனா பட்நாயக் புதன்கிழமை தொடக்கிவைத்தார். இதுகுறித்து முதன்மைக் கல்வி அலுவலர் என்.அருள்முருகன் கூறியதாவது: கோவை, பொள்ளாச்சி கல்வி மாவட்டங்களை உள்ளடக்கிய வருவாய் மாவட்டத்தின் கல்வி வளர்ச்சியை கருத்தில் கொண்டு புதிய இணையதளம் தொடங்கப்பட்டுள்ளது. இதன் மூலம் மாணவர்களுக்குத் தேவையான கையேடுகள், பொதுத் தேர்வு எழுதும் மாணவர்களுக்கான மாதிரி விடைத் தாள்கள், பாடத் திட்டங்கள் உள்ளிட்ட விவரங்கள் வழங்கப்படும்.

மேலும் ஆசிரியர்கள், பள்ளி நிர்வாகிகளுக்குத் தேவையான விவரங்கள், பணி வரன்முறை விவரங்கள், தேவையான விண்ணப்பப் படிவங்கள் இணையத்தில் பதிவேற்றம் செய்யப்படும். தேவைப்படும் படிவங்களை அந்தந்த பள்ளியின் தலைமை ஆசிரியர்கள் பதிவிறக்கம் செய்து பயன்படுத்திக் கொள்ளலாம். அதேபோல, கல்லூரிக் கல்வி பயில விரும்பும் மேல்நிலைப் பள்ளி மாணவர்களுக்குத் தேவையான வழிகாட்டி விவரங்கள், கோவை மாவட்டத்தில் உள்ள பல்கலைக்கழகங்கள், கல்லூரிகள் உள்ளிட்ட உயர் கல்வி நிறுவனங்களின் தகவல்கள், கல்வியுடன் தொடர்புடைய பிற துறைகளின் இணையதளங்களுக்கான இணைப்புகளும் வழங்கப்பட்டுள்ளன.

இந்த புதிய இணையதளம் மாணவர்கள், ஆசிரியர்களுக்கு உதவியாக இருப்பதுடன் கல்வித் துறை அதிகாரிகளை பள்ளிகளுடன் இணைக்கும் பாலமாகவும் இருக்கும் என்றார்.

இடம் பெயர்ந்த இறந்த வாக்காளர் பட்டியல் ஜூலை 18ல் வெளியீடு

வாக்காளர் பட்டியலில் உள்ள வாக்காளர்களின் விவரங்களை உறுதிப்படுத்தும் வகையில், தொகுதியில் இருந்து இடம்பெயர்ந்த, இறந்தவர்களின் தகவல்கள் பொது மக்கள் பார்வைக்கு வைக்கப்படும் என்று தமிழக தலைமைத் தேர்தல் அதிகாரி சந்தீப் சக்சேனா தெரிவித்தார். தேர்தல் நடத்தும் அதிகாரி, உதவி அதிகாரிகளின் அலுவலகங்களில் உள்ள தகவல் பலகைகளில் அந்த விவரங்கள் ஒட்டப்படும் என்றும் அவர் கூறியுள்ளார்.

இது குறித்து, தமிழக தலைமைத் தேர்தல் அதிகாரி சந்தீப் சக்சேனா புதன்கிழமை வெளியிட்ட அறிவிப்பு: வாக்காளர் பட்டியலை செம்மைப்படுத்தி, விவரங்களை உறுதிப்படுத்தும் திட்டம் தமிழகத்தில் கடந்த மார்ச் 3-ஆம் தேதி நடைமுறைப்படுத்தப்பட்டது. வாக்காளர் பட்டியலில் உள்ள தகவல்களை உறுதிப்படுத்தும் நடவடிக்கை தமிழகத்தில் வெற்றிகரமாக மேற்கொள்ளப்பட்டது. தகவல் பலகையில் ஒட்டப்படும்: இந்தப் பணியின் போது, வாக்காளர் பட்டியலில் பெயர் சேர்க்கவும், நீக்கவும், திருத்தம் செய்யவும் 16.40 லட்சம் விண்ணப்பங்கள் பெறப்பட்டன. இந்த விண்ணப்பங்களின் அடிப்படையில் கள ஆய்வு செய்து வாக்காளர் பட்டியலில் பெயர் இருந்தும், அந்த இடத்தில் இல்லாதவர்கள், இடத்தை வேறொரு இடத்துக்கு மாற்றியவர்கள், இறந்தவர்கள், பல இடங்களில் பெயர் பதிவு போன்றவற்றை கண்டறியவும் மாவட்ட தேர்தல் அதிகாரிகள் அறிவுறுத்தப்பட்டனர்.

இந்தப் பணிகளை ஜூலை 15-ஆம் தேதிக்குள் முடிக்க அறிவுறுத்தப்பட்டது. இந்த விவரங்கள் அனைத்தையும் தொகுத்து தேர்தல் நடத்தும் அதிகாரி, உதவி அதிகாரியின் அலுவலகத்தில் வரும் 18-ஆம் தேதி ஒட்டப்பட உள்ளது. ஒரு மாவட்டத்திலுள்ள அனைத்து சட்டப் பேரவைத் தொகுதிகளிலும் உள்ள இறந்த, இடமாற்றம் செய்த வாக்காளர்களின் விவரங்கள் மாவட்ட தேர்தல் அதிகாரியின் (ஆட்சியர் அலுவலகம்) அலுவலக தகவல் பலகையில் ஒட்டப்படும். மேலும், இதற்கான தகவல்கள் அடங்கிய குறுந்தகடு தமிழகத்தில் அங்கீகரிக்கப்பட்ட அரசியல் கட்சிகளுக்கு அளிக்கப்படும். அத்துடன், தலைமைத் தேர்தல் அதிகாரியின் இணையதளத்திலும் (www.elections.tn.gov.in) பதிவேற்றம் செய்யப்படும் என்று சந்தீப் சக்சேனா தெரிவித்துள்ளார்.