நாடு முழுவதும் 30 மாணவர்களுக்கு குறைவான 2.55 லட்சம் பள்ளிகள் இணைப்பு: மாநில அரசுகளிடம் கருத்து கேட்கிறது மத்திய அரசு

நாடு முழுவதும் 30 மாணவர்களுக்கு குறைவாக உள்ள 2.55 லட்சம் அரசு தொடக்கப்பள்ளிகளை அருகில் உள்ள  பள்ளிகளுடன் இணைப்பதற்காக அனைத்து மாநிலங்களின் கருத்துக்களையும் மத்திய மனிதவள மேம்பாட்டுத்துறை  கேட்டுள்ளது.

நாட்டில் தொடக்கக்கல்வி முதல் உயர்கல்வி வரை கல்வியின் தரத்தை மேம்படுத்துவதற்காக, அனைவருக்கும் கல்வி திட்டம்,  அனைவருக்கும் இடைநிலைக் கல்வித்திட்டம், ஆசிரியர் கல்வித்திட்டம் என்று பல்வேறு திட்டங்களை மத்திய அரசு  நடைமுறைப்படுத்துகிறது. இதற்காக ஆண்டுக்கு ₹75 ஆயிரம் கோடி வரை செலவிடவும் திட்டமிட்டுள்ளது. இந்த மூன்று திட்டங்களையும் ஒரே குடையின் கீழ் கொண்டு வருவதற்கான நடைமுறைகள் தொடங்கியுள்ளன. இந்நிலையில் அரசு  மற்றும் அரசு நிதியுதவி பெறும் பல பள்ளிகள், மாணவர்கள் எண்ணிக்கை குறைவு காரணமாக ஆண்டுதோறும் மூடப்பட்டு  வருவதாகவும், இதற்கு போதிய ஆசிரியர்கள் இல்லாததும், தரமான கல்வி இல்லாததும் காரணம் என்றும் தெரிய வந்துள்ளது.

மத்திய, மாநில அரசுகள் ஒவ்வொரு நிதியாண்டும் கல்விக்காக செலவிடும் நிதி அரசு, அரசு நிதியுதவி பள்ளி மாணவர்களை  முழுமையாக சேருவதில்லை என்று மத்திய மனிதவள மேம்பாட்டுத்துறை மேற்கொண்ட ஆய்வின் மூலம் தெரிய வந்துள்ளது. அதோடு  தேசிய அளவில் மாணவர்களின் கல்வித்தரம் குறைந்துள்ளதும் கண்டறியப்பட்டுள்ளது.இத்தகைய சூழலில் தொடக்க நடுநிலைப்பள்ளிகளில் கல்வியின் தரத்தை மேம்படுத்த மத்திய மனிதவள மேம்பாட்டுத்துறை  நடவடிக்கை மேற்கொண்டுள்ளது. அதன்படி நாடு முழுவதும் 30 மாணவர்களுக்கும் குறைவாக உள்ள அரசு, அரசு நிதியுதவி தொடக்க,  நடுநிலைப்பள்ளிகளை மற்ற அரசுப்பள்ளிகளுடன் இணைக்க முடிவு செய்யப்பட்டுள்ளது. இதற்காக அனைத்து மாநிலங்களின்  பள்ளிக்கல்வித்துறைகளிடமும் மத்திய மனிதவள மேம்பாட்டுத்துறை கருத்து கேட்டு கடிதம் அனுப்பி வைத்துள்ளது.

இந்த பள்ளிகள் இணைப்புப்பட்டியலில் இனி புதிதாக குழந்தைகளை சேர்க்க முடியாத நிலை உள்ள பள்ளிகள், 30 மாணவர்களுக்கு  குறைவாக உள்ள பள்ளிகள், போதிய ஆசிரியர்கள் இல்லாத 2.55 லட்சம் பள்ளிகள் அடையாளம் காணப்பட்டுள்ளன. இவ்வாறு  இணைக்கப்படும் பள்ளிகளுக்கு தேவையான இடவசதியை ஏற்படுத்துவதுடன், மாணவர்களின் எண்ணிக்கை அதிகரிக்கவும்,  அதற்கேற்ப ஆசிரியர்களை நியமிக்கவும் நடவடிக்கை எடுக்கப்படும்.

அத்துடன் மாணவர்களின் இடைநிற்றலை தடுக்கும் வகையில் பள்ளிகளில் கல்வியின் தரம் மேம்படுத்தப்படும். மேலும்,  அடித்தட்டு மக்களின் குழந்தைகளுக்கு தேவையான வசதிகளும் செய்து தரப்படும். மாநிலங்கள் தரும் கருத்துக்களின்  அடிப்படையில் அதற்கான மசோதா இறுதி செய்யப்பட்டு நாடாளுமன்றத்தின் ஒப்புதல் பெறப்படும் என்று பள்ளி கல்வித்துறை  அதிகாரிகள் தெரிவித்தனர்.

கல்வித் துறை செயல்பாடுகளால் அவதிக்குள்ளாகும் தலைமை ஆசிரியர்கள்

கல்வித் துறை அதிகாரிகளின் செயல்பாடுகளால் மாணவிகளுக்கு உதவித் தொகை வழங்க முடியாமல் பள்ளித் தலைமை ஆசிரியர்கள் கடும் அவதிக்குள்ளாகி வருகின்றனர்.
தாழ்த்தப்பட்ட மற்றும் பழங்குடியின மாணவிகளுக்கு மத்திய அரசு சார்பில் கல்வி உதவித் தொகை ஆண்டு தோறும் வழங்கப்பட்டு வருகிறது. மாணவிகளை ஊக்குவித்து அவர்கள் கல்வியைத் தொடர வேண்டும் என்ற நோக்கத்தில் மத்திய அரசு கல்வி உதவித் தொகையை வழங்கி வருகிறது.
3 முதல் 5-ஆம் வகுப்பு வரையிலான மாணவிகளுக்கு தலா ரூ. 500, 6-ஆம் வகுப்பு மாணவிகளுக்கு தலா ரூ. 1,000, 7 மற்றும் 8-ஆம் வகுப்பு மாணவிகளுக்கு தலா ரூ. 1,500 என கல்வி உதவித் தொகையாக ஆண்டுதோறும் வழங்கப்படுகிறது.
இதற்கான நிதியை மத்திய அரசு ஒதுக்கீடு செய்து மாநில அரசின் கல்வித் துறை மூலம் மாணவிகளுக்கு வழங்குகிறது. இத் தொகை உதவித் தொடக்கக் கல்வி அலுவலர்கள் மூலம் காசோலையாக சம்பந்தப்பட்ட பள்ளித் தலைமை ஆசிரியர் வழியாக மாணவிகளின் வங்கி அல்லது அஞ்சல் அலுவலகக் கணக்கில் செலுத்த வழிவகை செய்யப்பட்டுள்ளது. அவ்வாறு வழங்கப்படும் காசோலை தலைமை ஆசிரியர் மற்றும் பள்ளியின் பெயரைக் குறிப்பிட்டு, அந்த காசோலையை பாரத ஸ்டேட் வங்கியின் அனைத்து கிளைகளிலும் பணமாக்கிக் கொள்ளும் வசதி உள்ளது.
அதன்படி, சில வங்கிக் கிளைகளில் தலைமை ஆசிரியர்களின் அடையாளச் சான்றை சரிபார்த்துவிட்டு காசோலைக்கான பணத்தை தலைமை ஆசிரியரிடம் வங்கி அதிகாரிகள் வழங்குகின்றனர்.
சில வங்கிகளில் சம்பந்தப்பட்ட பள்ளியின் பெயருடன் கூடிய தலைமை ஆசிரியர் பெயரில் வங்கிக் கணக்கு இருந்தால் அக்கணக்கில் காசோலையை வரவு வைத்த பிறகு, பணம் எடுக்க அனுமதிக்கப்படும் என வங்கி அதிகாரிகள் தெரிவிக்கின்றனர். ஆனால், பள்ளிப் பெயருடன் கூடிய தலைமை ஆசிரியர் பெயரில் வங்கிக் கணக்கு பராமரிக்கப்படவில்லை எனக் கூறப்படுகிறது.
வங்கிக் கணக்கு இல்லாத பெயரில், சம்பந்தப்பட்ட பள்ளிகளுக்கு கல்வித் துறை அதிகாரிகள் பள்ளியின் பெயர் குறிப்பிட்டு காசோலைகளை வழங்கும் பட்சத்தில், அந்த காசோலையை பணமாக்க பள்ளிகளின் தலைமை ஆசிரியர்கள் பல்வேறு சிரமத்துக்கு உள்ளாகின்றனர். வங்கி அதிகாரிகளிடம் சென்று கோரிக்கை வைக்க வேண்டியுள்ளது. ஆனால், வங்கி அதிகாரிகள் அவர்களுடைய கோரிக்கையை ஏற்பதே இல்லை. காசோலைக்கு பணம் வழங்கும் வங்கிக் கிளைகளின் மேலாளர்களிடம் விசாரித்துவிட்டு பணம் வழங்கலாமே என்று கேட்டால் அதுமாதிரி ஏதும் செய்ய முடியாது எனக் கூறி திருப்பி அனுப்பி விடுகின்றனர். இதனால் தலைமை ஆசிரியர்கள் மன உளைச்சலுக்கு உள்ளாகின்றனர்.
பாரத ஸ்டேட் வங்கியின் சில கிளைகளில் காசோலையை பணமாக்க வழிமுறை உள்ளது.
அதே வங்கியின் சில கிளைகளில் காசோலையைப் பணமாக்க வழிமுறை இல்லையெனக் கூறி திருப்பி அனுப்புவது வேடிக்கையாக உள்ளது.
இவ்வாறான நிலைக்கு, வங்கியில் கணக்கு இல்லாத பெயருக்கு பள்ளிகளுக்கு கல்வித் துறை அதிகாரிகள் காசோலை வழங்குவதுதான் காரணமாக உள்ளது. தகவல் தொழில்நுட்பம் வளர்ந்துள்ள நிலையில் அரசுக் கணக்கிலிருந்து நேரடியாக இசிஎஸ் முறையில் மாணவிகளின் வங்கி அல்லது அஞ்சலகக் கணக்கில் கல்வி உதவித் தொகையை வரவு வைக்கக் கூடிய நிலையில், வங்கிக் கணக்கு இல்லாத பெயருக்கு காசோலை வழங்குவது மன உளைச்சல் மற்றும் அலைச்சலுக்கு உள்ளாக்குவதாகவும் தலைமை ஆசிரியர்கள் கூறுகின்றனர்.
சில வங்கிகள் காசோலைக்கு பணம் வழங்கக் கூடிய சூழ்நிலையில், சில பள்ளிகளின் தலைமை ஆசிரியர்கள் கல்வி உதவித் தொகையை சம்பந்தப்பட்ட மாணவிகளின் வங்கி அல்லது அஞ்சலகக் கணக்கில் செலுத்தி வரவு வைக்காமல், மாணவிகளின் பெற்றோரை அழைத்து பணமாகவே நேரடியாக வழங்கிவிடுவதாகவும் புகார் எழுந்துள்ளது. இவ்வாறு ரொக்கமாக வழங்கப்படும்போது முறைகேடு நடப்பதாகவும் கூறப்படுகிறது.
எனவே, இதுபோன்ற முறைகேடுகளைத் தடுக்கவும், பள்ளித் தலைமை ஆசிரியர்களை மன உளைச்சலுக்கும், அலைச்சலுக்கும் உள்ளாக்காமல் அரசுக் கணக்கிலிருந்து நேரடியாக சம்பந்தப்பட்ட மாணவிகளின் வங்கி அல்லது அஞ்சலகக் கணக்கில் இசிஎஸ் முறையில் செலுத்தி, வரவு வைக்க கல்வித் துறை அதிகாரிகள் நடவடிக்கை எடுக்க வேண்டும் என தலைமை ஆசிரியர்கள் எதிர்பார்க்கின்றனர்.
வங்கிக் கணக்கு இல்லாத பெயரில்,
சம்பந்தப்பட்ட பள்ளிகளுக்கு கல்வித் துறை அதிகாரிகள் பள்ளியின் பெயர் குறிப்பிட்டு காசோலைகளை
வழங்கும் பட்சத்தில், அந்த காசோலையை பணமாக்க
பள்ளிகளின் தலைமை ஆசிரியர்கள் பல்வேறு சிரமத்துக்கு உள்ளாகின்றனர். வங்கி அதிகாரிகளிடம் சென்று கோரிக்கை வைக்க வேண்டியுள்ளது.
ஆனால், வங்கி அதிகாரிகள் அவர்களுடைய கோரிக்கையை ஏற்பதே இல்லை. காசோலைக்கு பணம் வழங்கும் வங்கிக் கிளைகளின் மேலாளர்களிடம் விசாரித்துவிட்டு பணம் வழங்கலாமே என்று கேட்டால் அதுமாதிரி ஏதும் செய்ய  முடியாது எனக் கூறி திருப்பி அனுப்பி
விடுகின்றனர். இதனால் தலைமை ஆசிரியர்கள்
மன உளைச்சலுக்கு உள்ளாகின்றனர்.

கோடை விடுமுறையில் சிறப்பு வகுப்புகள் நடத்தினால் நடவடிக்கை

கோடை விடுமுறையின்போது தனியார் பள்ளிகளில் சிறப்பு வகுப்புகள் நடத்தக் கூடாது என்று பள்ளிக் கல்வித் துறை அமைச்சர் கே.ஏ.செங்கோட்டையன் தெரிவித்துள்ளார். இது குறித்து கோவை விமான நிலையத்தில் செய்தியாளர்களிடம் சனிக்கிழமை அவர் கூறியதாவது:

பொதுத் தேர்வுகள் நிறைவடைந்த பிறகு மதிப்பெண்கள் அடிப்படையில் 4 ஆயிரம் மாணவர்கள் தேர்வு செய்யப்பட்டு அவர்களுக்கு சிறப்புப் பயிற்சிகள் அளிக்கப்படும். பத்தாம் வகுப்புத் தேர்வில் அவர்கள் பெறும் மதிப்பெண்களின் அடிப்படையில் தேர்வு செய்யப்படும் இந்த மாணவர்களுக்கு 9 கல்லூரிகளில் தனிப் பயிற்சி வழங்கப்படும். இதன் மூலம் அவர்கள் எந்தத் தேர்வையும் சந்திக்கும் துணிவைப் பெறுவார்கள். பிளஸ் 2 முடித்த பிறகு எந்தப் பாடம் படிக்கலாம் என்பதில் மாணவர்களுக்கு குழப்பம் உள்ளது. மாணவர்கள் மேல்நிலைத் தேர்வுக்குப் பிறகு 286 வகையான பாடங்களில் மேற்படிப்பு படிக்கலாம்.

இது குறித்து விழிப்புணர்வு பெறுவதற்காக அனைத்துப் பள்ளிகளிலும் அறிவிப்புப் பலகைகள் வைக்கப்படும். மருத்துவம், பொறியியல் போன்ற சில குறிப்பிட்ட மேற்படிப்புகள் மட்டுமின்றி அனைத்து வகையான படிப்புகள் குறித்தும் மாணவர்கள் தெரிந்துகொள்ள முடியும்.

இலவச பயண அட்டை வைத்திருக்கும் மாணவர்கள் அரசுப் பேருந்துகளில் பயணம் செய்வதில் சிரமங்கள் இருப்பதாகப் புகார்கள் ஏதும் வந்தால் அது குறித்து உடனடியாகப் போக்குவரத்துத் துறை அமைச்சரிடம் பேசி பிரச்னைக்குத் தீர்வு காணப்படும். தமிழகத்தில் கோடை விடுமுறை அறிவிக்கப்பட்ட பிறகு அரசுப் பள்ளிகளில் சிறப்பு வகுப்புகள் நடத்தக்கூடாது என்று உத்தரவிடப்பட்டுள்ளது. இந்த உத்தரவு தனியார் பள்ளிகளுக்கும் பொருந்தும். இந்த உத்தரவை மீறி சிறப்பு வகுப்புகளை நடத்தும் தனியார் பள்ளிகள் மீது நடவடிக்கை எடுக்கப்படும் என்றார் அவர்.

ஆதார் தகவல்கள்

ஆதார் தகவல்கள் எங்கெல்லாம் பயன்படுத்தப்பட்டுள்ளன?: தனி நபர் அறிந்துகொள்ள யுஐடிஏஐ இணையதளத்தில் வசதி

ஆதார் தகவல்கள் பாதுகாப்பாக உள்ளதா என பொதுமக்கள் மத்தியில் அச்சம் நிலவும் வேளையில் தனி நபர், அவரது ஆதார் விவரங்கள் எங்கெல்லாம் பயன்படுத்தப்பட்டுள்ளன என்பதை அறியும் வசதி யுஐடிஏஐ இணையதளத்தில் வழங்கப்பட்டுள்ளது.

மத்திய, மாநில அரசுகளின் நிதி சார்ந்த சேவைகள், நலதிட்டங்கள், மானியங்கள் உள்ளிட்டவற்றை உண்மையான பயனாளிகளிடம் சேர்ப்பதற்காக ஆதார் கொண்டுவரப்பட்டது. ஆதார் பதிவு மற்றும் அட்டை அச்சிட்டு வழங்கும் பணிகளை யுஐடிஏஐ (இந்திய தனித்துவ அடையாள ஆணையம்) மேற்கொண்டு வருகிறது. ஆனால் ஆதார் பதிவு பணிகளை யுஐடிஏஐ நிறுவனமே நேரடியாக மேற்கொள்ளாமல், தனியார் முகமைகள் மூலமாக மேற்கொண்டு வருகிறது. இதனால் தனி நபரின் ஆதார் விவரங்கள் வெளியில் கசிந்து விடுமோ என பொதுமக்கள் மத்தி யில் அச்சம் நிலவுகிறது.

இதற்கிடையில், வாடிக்கையாளர்களிடம் முறையான அனுமதி பெறாமல், ஆதார் தரவுகளைப் பயன்படுத்தி பேமென்ட் வங்கிக் கணக்குகளைத் திறந்த தொலைத்தொடர்பு நிறுவனத்தின் மீது யுஐடிஏஐ நிறுவனம் நடவடிக்கை எடுத்துள்ளது.

இதுபோன்ற சம்பவங்கள், பொதுமக்களின் சந்தேகத்துக்கு வலு சேர்க்கிறது. இந்நிலையில், ஆதார் தரவுகள் திருடப்படும் வாய்ப்பு அறவே இல்லை என்று யுஐடிஏஐ தலைவர் அஜய் பூஷண் பாண்டே உச்ச நீதிமன்றத்தில் தெரிவித்துள்ளார்.

இத்தகைய சூழலில், பொதுமக்கள் மத்தியில் ஆதார் விவரங்கள் பாதுகாப்பாக உள்ளது என்ற நம்பிக்கையை ஏற்படுத்தும் விதமாக, தனி நபர்களின் ஆதார் விவரங்கள் எங்கெல்லாம் பயன் படுத்தப்பட்டுள்ளன என்பதை சம்பந்தப்பட்ட நபர்கள் மட்டும் தெரிந்துக்கொள்ளும் வசதியை, யுஐடிஏஐ நிறுவனம், அதன் இணையதளமான http://uidai.gov.in -ல் வழங்கியுள்ளது.

இதுதொடர்பாக யுஐடிஏஐ நிறுவன அதிகாரிகள் கூறிய தாவது:

ஒரு நபர் சிம் கார்டு வாங்குவதற்காகவோ, குடும்ப அட்டை அல்லது வங்கிக் கணக்குடன் ஆதார் எண்ணை இணைத்தாலோ அது குறித்த விவரங்கள் மற்றும் நாள், தேதி, நேரம் உட்பட அனைத்து விவரங்களும் யுஐடிஏஐ இணையதளத்தில் பதிவாகிவிடுகிறது. அதை யுஐடிஏஐ இணையதள முகப்பு பக்கத்தில் Aadhaar Services என்பதன் கீழ் உள்ள Aadhaar Authentication History -ஐ கிளிக் செய்து தெரிந்து கொள்ளலாம். அதை கிளிக் செய்யும்போது, ஆதார் எண், பாதுகாப்பு குறியீடு ஆகியவை கேட்கப்படும். அதை கொடுத்தால், சம்பந்தப்பட்ட கைபேசி எண்ணுக்கு ஓடிபி எண் அனுப்பப்படும்.

அதன் பின்னர், திரையில் எந்த வகையான விவரங்கள் தேவை என கேட்கும். அதாவது, ஆதார் விவரங்களுக்காக ஓடிபி பெற்றது, பெயர், முகவரி (டெமோகிராபிக்) போன்ற விவரங்கள் பயன்படுத்தப்பட்டது, கருவிழி படலம், கை ரேகை (பயோமெட்ரிக்) போன்ற விவரங்கள் பயன்படுத்தப்பட்டது அல்லது அவை அனைத்தையும் பயன்படுத்தியது தொடர்பானதைத் தேர்வு செய்ய வேண்டும்.

பின்னர் ஓடிபி எண்ணை உள்ளீடு செய்தால், தனி நபரின் ஆதார் விவரங்கள் பயன்படுத்தப்பட்டது தொடர்பான விவரங்கள் தெரியும். ஒருவேளை ஆதார் எண்ணை வங்கிக் கணக்குடன் இணைக்க முற்பட்டு, தோல்வி அடைந்தால், அது குறித்த விவரங்களையும் அதில் பார்க்க முடியும். இதுபோன்ற விவரங்களைக் கடைசி 6 மாதங்கள் வரையிலான, 50 பதிவுகள் மட்டுமே கிடைக்கும்.

இதில் சந்தேகத்துக்கு இடமான வகையில், ஆதார் பயன்படுத்தப்பட்டிருப்பது தெரியவந்தால் யுஐடிஏஐ நிறுவனத்திடம் புகார் தெரிவிக்கலாம்.

இவ்வாறு அதிகாரிகள் தெரிவித்தனர்.

சர்வசிக்‌ஷா அபியான் உள்பட பள்ளிக்கல்வி திட்டங்கள் ஒன்றாக இணைப்பு : மத்திய அரசு ரூ.75ஆயிரம் கோடி ஒதுக்கீடு

மத்திய அரசு கடந்த 2000ம் ஆண்டில் அனைவருக்கும் கல்வி இயக்கம் என்ற திட்டத்தை கொண்டு வந்தது. இது 10 ஆண்டுகள் நடைமுறையில் இருக்கும் என்று தெரிவித்தது. 10 ஆண்டுகளுக்கு பிறகு அந்த திட்டம் மேலும் நீட்டிக்கப்பட்டது. அதைத் தொடந்து 2010ம் ஆண்டு மத்திய இடைநிலைக் கல்வி திட்டத்தையும் மத்திய அரசு கொண்டு வந்தது. இந்த இரண்டு திட்டங்கள் தமிழகம் உள்பட அனைத்து மாநிலங்களிலும் நடைமுறையில் உள்ளன. இந்நிலையில் இந்த இரண்டு திட்டங்களுக்கும் ஒவ்வொரு ஆண்டும் தனித்தனியாக நிதி ஒதுக்கப்பட்டு வருகிறது.

இப்போது, மத்திய அரசின் மனித வள மேம்பாட்டுத் துறை மேற்கண்ட இரண்டு திட்டங்களையும் ஒன்றாக இணைப்பது, அத்துடன் ஆசிரியர் கல்வி திட்டத்தையும் ஒன்றாக இணைப்பது  குறித்து ஆலோசித்து வந்தது. இதற்கான ஆய்வுக் கூட்டம் புதுடெல்லியில் நேற்று முன்தினம் நடந்தது. அதில் பிரதமர் நரேந்திர மோடி கலந்து கொண்டார். கூட்டத்தில் எடுக்கப்பட்ட முடிவுகளின் பேரில் மேற்கண்ட 3 திட்டங்களையும் ஒரே திட்டமாக செயல்படுத்த முடிவு செய்துள்ளனர். ஒருங்கிணைந்த இந்த திட்டம் ஏப்ரல் 1ம் தேதி முதல் மார்ச் 2020 வரை ஒரே திட்டமாக செயல்படும். இதற்காக ரூ.75 ஆயிரம் கோடி நிதி ஒதுக்க திட்டமிடப்பட்டுள்ளது. இந்த ஒருங்கிணைந்த திட்டத்திற்கு ஏற்ப பள்ளிக் கல்வித்துறை வடிவமைக்கப்படும். கல்விக்கான தற்போதைய நிதி ஒதுக்கீட்டில் 20 சதவீதம் அதிகரிக்கவும் முடிவு செய்யப்பட்டுள்ளது.

புதிய பாடத்திட்டத்தில் ஆசிரியர்களுக்கு பயிற்சி ஜூன் முதல் வாரத்தில் அளிக்கப்படும்

தமிழகத்தில் பள்ளிக்கூடங்களில் 5 ஆண்டுக்கு ஒரு முறை பாடத்திட்டம் மாற்றப்படவேண்டும். ஆனால் பல ஆண்டு களாக மாற்றப்படாமல் இருந்தது.

இதன் காரணமாக தமிழக அரசு புதிய பாடத்திட்டத்தை தயாரித்தது. அதன்படி 1-வது வகுப்பு, 6-வது வகுப்பு, 9-வது வகுப்பு, 11-வது வகுப்பு ஆகியவற்றுக்கு 2018-2019 கல்வி ஆண்டில் புதிய பாடத்திட்டம் அமல்படுத்தப்படும்.

அவ்வாறு அமல்படுத்தும்போது அந்த பாடத்தை எவ்வாறு கற்பிக்கவேண்டும். அதில் உள்ள கதைகளை எப்படி சொல்லவேண்டும். புதிய தொழில் நுட்பத்தில் எவ்வாறு மாணவர்களுக்கு கற்பிக்க வேண்டும் என்பது குறித்து ஆசிரியர்களுக்கு பயிற்சி அளிக்கப்பட உள்ளது. பயிற்சி குறித்து சென்னை டி.பி.ஐ. வளாக பள்ளிக்கல்வி அதிகாரி ஒருவர் கூறியதாவது:-

புதிய பாடத்திட்டம் குறித்து மாணவர்-மாணவிகளுக்கு கற்பிக்க பயிற்சி அளிக்கப்படுவது உறுதி. பயிற்சி இல்லாமல் மாணவர்களுக்கு கற்பிக்க முடியாது. ஆசிரியர்களுக்கும், மாணவர்களுக்கும் கோடைவிடுறை விரைவில் விட உள்ளது. கோடை விடுமுறையின்போது ஆசிரியர்களை தொந்தரவு செய்யாமல் பள்ளிகள் திறந்த பின்பு ஜூன் மாதம் முதல் வாரத்தில் ஆசிரியர்களுக்கு பயிற்சி அளிக்கப்படும். பயிற்சி ஒரு வாரம் அல்லது 2 வாரம் நடைபெறும்.

மாணவர்கள் மனப்பாடம் செய்வதை முடிந்த அளவுக்கு குறைத்து அவர்களுக்கு புரிந்து கொள்ளும்படி கற்பிக்கவேண்டும். ஏன் என்றால் மனப்பாடம் இல்லாமல் படித்தால் போட்டித்தேர்வு உள்ளிட்ட எந்த தேர்வையும் மாணவர்கள் எதிர்கொள்ளலாம். அதன் காரணமாக புதிய பாடத்திட்டத்தின்படி முடிந்த அளவுக்கு ஆசிரியர்கள் மாணவர்களுக்கு கம்ப்யூட்டரை பயன்படுத்தி பாடம் கற்பிக்க வேண்டி இருக்கும்

ரிலையன்ஸ் ஜியோ அதிரடி அறிவிப்பு… பிரைம் வாடிக்கையாளர்களுக்கு இன்ப அதிர்ச்சி….

ரிலையன்ஸ் ஜியோ பிரைம் உறுப்பினர் திட்டத்தில் ஏற்கனவே ரூ.99 செலுத்தி உறுப்பினர்களாக இருப்பவர்களுக்கு கூடுதலாக ஒரு ஆண்டு சந்தா நீட்டிக்கப்பட்டுள்ளதாக ரிலையனஸ் நிறுவனம் அறிவித்துள்ளது.

2017 ஆம் ஆண்டு ஏப்ரல் மாதம் முதல் ஜியோவின் கட்டண சேவை ஆரம்பித்தது. அதில் ஜியோ வாடிக்கையாளர்கள் பிரைம் வாடிக்கையாளராக ரூ. 99 கட்டி இணைந்தனர். இந்நிலையில், பிரைம் உறுப்பினர் சேவை வரும் 31-ம் தேதியோடு முடிய உள்ளது. இதையடுத்து, அடுத்து உறுப்பினர் கட்டணம் செலுத்த வேண்டுமா அல்லது ரீசார்ஜ் செய்ய வேண்டுமா என்பதுகுறித்த கேள்வி எழுந்தது.

அது குறித்து ரிலையன்ஸ் ஜியோ நிறுவனம் இன்று அறிவி்ப்பு வெளியிட்டுள்ளது. அதில் கூறப்பட்டு இருப்பதாவது:

ஜியோ பிரைமில் ரூ99 செலுத்தி ஏற்கனவே வாடிக்கையாளர்களாக இருப்பவர்களுக்கு மேலும் ஒரு ஆண்டு சேவை நீட்டிக்கப்படுகிறது. இந்த சலுகை வரும் 31-ம்தேதிக்குள் ரூ.99 செலுத்தி பிரைம் திட்டத்தில் சேர்பவர்களுக்கும் பொருந்தும்.

ஏற்கனவே ரூ99 செலுத்தி உறுப்பினர்கள் மார்ச்31-ம்தேதிக்கு பின் மீண்டும் ரூ.99 செலுத்தத் தேவையில்லை. அதேசமயம், ஏப்ரல் 1-ம் தேதிக்கு பின் ஜியோ பிரைமில் இணையும் வாடிக்கையாளர்கள் மட்டும் ரூ.99 உறுப்பினர் கட்டணமாக செலுத்த வேண்டும்.

பிரைம் வாடிக்கையாளர்களுக்கு இலவச சேவைகள் அடுத்த 12 மாதங்களுக்கு தொடரும் இவ்வாறு அதில் தெரிவிக்கப்பட்டுள்ளது.

சிபிஎஸ்இ மறு தேர்வு: பிளஸ் 2 பொருளாதாரப் பாடத்துக்கு நாடு முழுவதும் ஏப்ரல் 25-ம் தேதி தேர்வு: 10-ம் வகுப்புக்கு முடிவாகவில்லை

சிபிஎஸ்இ கேள்வித்தாள் வெளியாகி பெரும் சர்ச்சைக்குள்ளாகி வரும் நிலையில், நாடு முழுவதும் பிளஸ் 2 பொருளாதாரப் பாடத்துக்கு ஏப்ரல் 25-ம்தேதி மறு தேர்வு நடத்தப்படும் என அறிவிக்கப்பட்டுள்ளது.

அதேசமயம், 10-ம்வகுப்பு கணிதம் பாடத்துக்கு மறுதேர்வு டெல்லி என்சிஆர் மற்றும் ஹரியாணா மாநிலங்களில் மட்டும் ஜூலை மாதம் நடைபெறும் எனத் தெரிவிக்கப்பட்டுள்ளது.

சிபிஎஸ்இ 10-ம்வகுப்பு கணிதம், பிளஸ் 2 பொருளாதாரம் பாடத்தின் கேள்வித்தாள் கடந்த செவ்வாய்க்கிழமை வாட்ஸ் அப்பில் வெளியானது. இதையடுத்து, சிபிஎஸ்இ அமைப்பு மறு தேர்வு நடத்தப்படும் என அறிவித்தது.

சிபிஎஸ்இ அமைப்பின் அறிவிப்பை எதிர்த்து மாணவர்கள் டெல்லியில் இன்று போராட்டம் நடத்தினார்கள். சிபிஎஸ்இயின் பொறுப்பற்ற செயலுக்கு மாணவர்கள் ஏன் பொறுப்பேற்க வேண்டும், மீண்டும் மறு தேர்வு ஏன் எழுதவேண்டும் எனக் கேள்வி எழுப்பினார்கள்.

இதனால், பிளஸ் 2, 10-ம் வகுப்புக்கு எப்போது தேர்வு நடக்கும் என்ற தெளிவில்லாத சூழல் நீடித்து வந்தது.

இந்நிலையில், மத்திய மனிதவள மேம்பாட்டுத்துறையின் பள்ளிக் கல்வித்துறை செயலாளர் அனில் ஸ்வரூப் இன்று நிருபர்களுக்கு பேட்டி அளித்தார்.

அப்போது அவர் கூறியதாவது:

சிபிஎஸ்இ தேர்வு நடத்திய விதத்தில் தவறு நடந்துவிட்டது. 10-வகுப்பு கணிதம்(கோட் 041) பாடத்துக்கான கேள்வித்தாள் டெல்லி, ஹரியாணா, என்சிஆர் பகுதிகளில் மட்டுமே வெளியாகி இருக்கிறது. நாடு முழுவதும் வெளியாகி இருப்பதற்கான ஆதாரங்கள் ஏதும் இல்லை.

ஆதலால், டெல்லி, என்சிஆர், ஹரியாணா மாநிலங்களில் மட்டும் வரும் ஜூலை மாதம் 10-ம் வகுப்பு கணிதம் பாடத்துக்கு மறுதேர்வு நடத்தப்படும். இதற்கான தேதிகள் அடுத்த 15 நாட்களில் முடிவு எடுக்கப்பட்டு அறிவிக்கப்படும்.

ஆனால், பிளஸ் 2 பொருளாதாரம் (கோட் 030) பாடத்துக்கான வினாத்தாள் நாடு முழுவதும் வெளியாகி இருக்கிறது. ஆதலால், இந்தப் பாடத்துக்கான மறு தேர்வு ஏப்ரல் 25-ம் தேதி நடைபெறும். இந்தியாவுக்கு வெளியே அதாவது வெளிநாடுகளில் உள்ள சிபிஎஸ்இ பள்ளிகளில் இந்தத் தேர்வுகள் நடைபெறாது. ஏற்கெனவே தேர்வு மையம் எங்கு இருந்ததோ அதே இடத்திலேயே இந்த தேர்வு நடைபெறும், பழைய அனுமதிச்சீட்டையே பயன்படுத்திக்கொள்ளலாம்.

மற்ற தேர்வுகளில் எந்தவிதமான மாற்றமும் இல்லை. அது வழக்கம் போல் நடைபெறும் மறு தேர்வுகளால், தேர்வு முடிவுகளை வெளியிடுவதில் எந்தவிதமான தாமதமும் ஏற்படாது. வழக்கம் போல் மே மாதம் இறுதியில் நடைபெறும்.

சிபிஎஸ்இ கேள்வித்தாள் வெளியானது தொடர்பாக சிபிஎஸ்இ தலைவர் அனிதா அகர்வால் மீது விசாரணை நடத்தப்படும். இதற்கு காரணமானவர்கள் மீதும், பொறுப்பானவர்கள் மீதும் நடவடிக்கை எடுக்கப்படும். எந்த விதமான விசாரணையில்லாமல் இப்போது யார் மீதும் நடவடிக்கை எடுக்க முடியாது.

இந்த கேள்வித்தாள்கள் எப்படி வெளியாகின என்பது குறித்து இன்னும் தெளிவான விடை இன்னும் கிடைக்கவில்லை. முதல்கட்ட ஆதாரங்கள் கிடைத்துள்ளன. அதன் அடிப்படையில் இனி விசாரணை நடத்தப்படும். எங்களுடைய கவலை மாணவர்கள் எந்த சூழலிலும் பாதிக்கப்படக்கூடாது என்பதுதான். குழந்தைகளின் நலனே முக்கியம்'' அனில் ஸ்வரூப் தெரிவித்தார்.

கவுன்டர்களில் விண்ணப்பிப்பவர்களுக்கு டிக்கெட் கட்டணத்தில் 5 சதவீதம் தள்ளுபடி வழங்கும் திட்டம்: தெற்கு ரயில்வே அறிவிப்பு

தெற்கு ரயில்வே நேற்று வெளியிட்டுள்ள அறிக்கையில் கூறியிருப்பதாவது: ரயில்வே டிக்கெட் கவுன்டர்களில் முன்பதிவு செய்ய விண்ணப்பிப்பவர்களுக்கு அடிப்படை கட்டணத்தில் இருந்து 5 சதவீதம் தள்ளுபடி அளிக்கும் ‘பயணிகள் முன்பதிவு திட்டம்’ வரும் ஏப்ரல் 2ம்தேதி முதல் அறிமுகப்படுத்தப்படுகிறது. இந்த திட்டம் 3 மாதத்துக்கு பரீட்சார்த்த முறையில் செயல்படுத்தப்படும்.

ரயில்வே டிக்கெட் முன்பதிவு மையங்களில் மட்டுமே இந்த திட்டம் செல்லுபடியாகும். இந்த திட்டத்தின் கீழ் கட்டணத்தில் 5 சதவீதம் தள்ளுபடி பெற முன்பதிவு செய்யும் ரயில் கட்டணம் ரூ.100க்கும் மேல் இருக்க வேண்டும். இந்த தள்ளுபடி திட்டம் சீசன் டிக்கெட் எடுப்பவர்கள், ஆன்லைனில் முன்பதிவு செய்பவர்களுக்கு பொருந்தாது. புறநகர் ரயில்களில் பயணம் செய்ய சீசன் டிக்கெட் எடுப்பவர்களுக்கு 0.05 சதவீதம் தள்ளுபடி வழங்கும் முறை ஏற்கனவே உள்ளது. முன்பதிவு மையங்களில் முதல் பட்டியலில் வருபர்களுக்கு மட்டுமே இந்த திட்டம் செல்லுபடியாகும். இவ்வாறு கூறப்பட்டுள்ளது.