டிசம்பருக்குள் அரசு ஊழியர் பணிப்பதிவேடு கணினிமயமாக்கம் : முதன்மை செயலர் தகவல்

டிசம்பருக்குள் தமிழகத்திலுள்ள ஒன்பது லட்சம் அரசு ஊழியர்களின் பணிப்பதிவேடுகள் (சர்வீஸ் ரிக்கார்டு) கணினிமயமாக்கப்படும்,'' என, கருவூலம் மற்றும் கணக்குத்துறை முதன்மை செயலர் ஜவஹர் தெரிவித்தார். அவர் மேலும் கூறியதாவது:

திறந்த வெளிப்படையான விரைவான நிர்வாகத்தை உறுதி செய்யும் வகையில், அரசு ஊழியர்களின் பணிப்பதிவேடுகளை கணினிமயமாக்கும் பணி நடக்கிறது. இதுவரை, 60 சதவீதம் பணிகள் முடிந்துள்ளன. தற்போதைய நடைமுறையின்படி பணிப்பதிவேடுகளை பராமரிப்பதில், பல நடைமுறை சிக்கல்கள் உள்ளன.

ஒரு அரசு ஊழியர் அவரது பணிப்பதிவேட்டை முறையாக கவனித்திருக்க இயலாது. அவர் ஓய்வு பெறும் நிலையில் ஏற்கனவே பணிபுரிந்த அலுவலகத்தில் சம்பள விவரங்களை பதிவு செய்ய விடுபட்டிருந்தால், அவர் அந்த அலுவலகத்திற்கு சென்று அதை சரி செய்ய வேண்டும். இதனால் அவர் பணியிலிருந்து ஓய்வு பெற்றவுடன் ஓய்வூதிய பலன்களை உடனடியாக வழங்க முடியாத நிலை ஏற்படும். கணினிமயமாக்குவதன் மூலம், உடனுக்குடன் இதுபோன்ற குறைகளை சரி செய்ய முடியும். வங்கி கணக்குகளை அலைபேசியில் வாடிக்கையாளர்கள் பார்த்து கொள்வதை போல, அரசு ஊழியர்கள் தங்கள் அலைபேசியில் பணிப்பதிவேடு பதிவுகளை பார்த்து கொள்ளலாம்.

ஊழியர்கள் குறித்து வயது, பணி அனுபவம் என ஏதாவது ஒரு அடிப்படையில் கணக் கெடுக்க அரசு உத்தரவிடும் போது, தற்போது மூன்று நாட்களுக்கு மேலாகி விடுகிறது. கணினிமயமாக்குவதால், உடனுக்குடன் கணக்கெடுத்து விட முடியும். இதுகுறித்து அடுத்த வாரம் திருநெல்வேலி, திண்டுக்கல்லில் ஆய்வு கூட்டங்கள் நடத்தப்படவுள்ளது, என்றார்

அக்டோபர் மாதத்துக்குள் அரசுப் பள்ளிகள் அனைத்திலும் இணையதள சேவை..! அமைச்சர் செங்கோட்டையன் உறுதி

அக்டோபர் மாத இறுதிக்குள் அனைத்து அரசுப் பள்ளிகளுக்கும் இணையதள சேவை வழங்கப்படும் என்று பள்ளிக் கல்வித்துறை அமைச்சர் செங்கோட்டையன் தெரிவித்துள்ளார். பள்ளிக் கல்வித்துறையில் சமீபகாலமாகப் பல்வேறு மாற்றங்கள் செய்யப்பட்டுவருகின்றன.

ஐந்து ஆண்டுகளுக்கு மேலாகப் பாடத்திட்டங்கள் மாற்றப்படாமல் உள்ளது என்று தொடச்சியாகப் புகார்கள் வந்துகொண்டிருந்தன. அதையடுத்து, பாடத்திட்டங்கள் மாற்றும் பணி தீவிரமாக நடந்துவருகிறது. இந்தநிலையில் செய்தியாளர்களிடம் பேசிய அமைச்சர் செங்கோட்டையன், 'பாடத்திட்டம் மாற்றம் தீவிரமாக நடைபெற்றுவருகிறது.

நவம்பர் மாத இறுதிக்குள் வரைவுப் பாடத்திட்டம் வெளியிடப்படும். வரைவுப் பாடத்திட்டம் தொடர்பாக 15 நாள்கள் வரை மக்கள் கருத்து கூறலாம். அரசுப் பள்ளி மற்றும் தனியார் பள்ளிகளுக்கிடையே உள்ள வேறுபாடுகளைக் களைய நடவடிக்கை எடுக்கப்படும். மாணவர்கள் 5 மரக் கன்றுகள் நட்டால், 5 மதிப்பெண்கள் வழங்கப்படும். அரசின் அனைத்துப் பள்ளிகளிலும் இம்மாத இறுதிக்குள் இணையதள சேவை வழங்கப்படும்' என்று தெரிவித்தார்.

ஆனந்தவிகடனில் வந்த என் கட்டுரை 5-10-17

தமிழகத்தில் கடும் எதிர்ப்பை மீறி 32 மாவட்டத்தில் நவோதயா பள்ளிகள்

தமிழகத்தில் நிலவும் கடும் எதிர்ப்புகளுக்கு இடையே 32 மாவட்டங்களில் விரைவில் நவோதயா பள்ளிகள் திறக்கப்பட உள்ளன. தமிழகத்தில் நவோதயா பள்ளிகள் தொடங்க பல்வேறு தரப்பினர் கடும் எதிர்ப்பு தெரிவித்துள்ளனர். இருப்பினும், தமிழக அரசின் இசைவு கிடைத்துள்ளதால் விரைவில் 32 மாவட்டங்களில் ஜவகர் நவோதயா பள்ளிகள் வரப்போகின்றன.

நவோதயா பள்ளிகள் தமிழகத்தில் அமைப்பதற்கான நிலம் தேடுவது, தமிழை ஒரு பாடமாக வைப்பது உள்ளிட்ட விஷயங்கள் குறித்து ஆய்வு செய்யப்பட்டு வருகிறது. தமிழக கொள்கைளுக்கு ஏற்ப திட்டங்கள் தெளிவாக இருந்தால் 32 மாவட்டங்களில் தலா ஒரு பள்ளி வீதம் திறக்க தமிழக அரசும் இசைவு தெரிவித்துள்ளது. மத்திய இடைநிலைக் கல்வி வாரியமும் தமிழக அரசுடன் பேச்சுவார்த்தை நடத்த திட்டமிட்டுள்ளது.

கடந்த ஆண்டு மேற்கண்ட 32 பள்ளிகளை திறக்க மத்திய அரசு வாய்ப்பு கொடுத்தும் அதை தமிழகம் நிராகரித்தது. தமிழக அரசின் முடிவை எதிர்த்து இந்த ஆண்டு பொது நல வழக்கு தொடரப்பட்டுள்ளது. இதையடுத்து, தமிழகத்தில் நவோதயா பள்ளிகளை தொடங்க அனுமதிக்க வேண்டும் என்று உயர் நீதிமன்றம் தெரிவித்துள்ளது குறிப்பிடத்தக்கது.

9ம் வகுப்பு மாணவர்களுக்கு இன்று கற்றல் முன்னறிவு தேர்வு : மெல்ல கற்போருக்கு சிறப்பு பயிற்சி

அரசு பள்ளிகளில், தமிழ் வழியில் படிக்கும், ஒன்பதாம் வகுப்பு மாணவர்களுக்கு, கற்றல் முன்னறிவு தேர்வு, இன்று நடக்கிறது. அரசுப் பள்ளிகளில் படிக்கும் மாணவர்களை, திறன் மிக்கவர்களாக உருவாக்க, கல்வித் துறை நடவடிக்கைகள் மேற்கொண்டு வருகிறது. மத்திய அரசின், 'நீட்' தேர்வை எதிர்கொள்ளும் வகையில், அரசுப் பள்ளி மாணவர்களை தயார்படுத்த வேண்டும். இதற்காக, 'ஸ்மார்ட்' வகுப்பறைகள், சிறப்பு பாட திட்டங்கள் செயல்படுத்தப்பட உள்ளன.

அரசுப் பள்ளிகளில், தமிழ் வழியில், ஒன்பதாம் வகுப்பு படிக்கும் மாணவர்கள் அனைவருக்கும், இன்று, கற்றல் முன் அறிவு தேர்வு நடத்தப்படுகிறது. அனைவருக்கும் இடைநிலை கல்வி திட்டம் சார்பில் இது செயல்படுத்தப்படுகிறது. கணிதம், அறிவியல், ஆங்கிலம் பாடங்களில் இத்தேர்வு நடைபெறும். இதற்கென சிறப்பு வினாத்தாள் தயாரிக்கப்பட்டுள்ளது. இத்தேர்வில், ஒவ்வொரு பாடத்திலும், 15 மதிப்பெண்ணுக்கும் குறைவாக பெற்ற மாணவர்கள் அடையாளம் காணப்பட்டு, அவர்களுக்கு சிறப்பு பயிற்சி அளிக்கப்படும். இப்பயிற்சிக்குப் பின், மீண்டும் அடைவு தேர்வு நடத்தப்படும்.

இதன் மூலம், மெல்ல கற்கும் மாணவர்களை, பயிற்சிக்குப் பின், சக மாணவர்களுடன் இணைக்கும் வகையில், நடவடிக்கை எடுக்கப்படும். இத்தேர்விற்கான வினாத்தாள் கட்டுகள், நேற்று, தலைமை ஆசிரியர்களிடம் ஒப்படைக்கப்பட்டன. கல்வி துறையின் இந்த நடவடிக்கையால், 10ம் வகுப்பு பொதுத்தேர்வில் தேர்ச்சி சதவீதம் அதிகரிக்கும் என, ஆசிரியர்கள் தெரிவித்தனர்.

வியாழன் தோறும் பள்ளிகளில் 'டெங்கு' விழிப்புணர்வுக்கு உத்தரவு

வியாழன் தோறும், பள்ளிகளை சுத்தம் செய்து, 'டெங்கு' விழிப்புணர்வு ஏற்படுத்த, பள்ளிக்கல்வித் துறை உத்தரவிட்டுள்ளது. தமிழகத்தில், டெங்கு காய்ச்சல் பரவும் நிலையில், பள்ளிகளில், டெங்கு தடுப்பு நடவடிக்கைக்கு உத்தரவிடப்பட்டுஉள்ளது.

பள்ளிக் கல்வி இயக்குனர் இளங்கோவன், நேற்று முன்தினம் அனுப்பியுள்ள சுற்றறிக்கை:

 பள்ளிகளின் காலை பிரார்த்தனை கூட்டத்தில், டெங்கு காய்ச்சல் தடுப்பு, விழிப்புணர்வு ஏற்படுத்த வேண்டும்

 டெங்கு கொசுக்கள், நன்னீரில் உற்பத்தியாவதால், பள்ளி வளாகங்களில் நீர் தேங்காமல், சுத்தமாக வைத்து இருக்க வேண்டும்

 டெங்கு பரவும் முறை; அதை தடுக்கும் வகையில், பள்ளிகளையும், வீட்டையும் சுத்தமாக வைத்திருக்கும் முறைகளை மாணவர்களுக்கு, ஆசிரியர்கள் தெரிவிக்க வேண்டும்

 உள்ளாட்சி துப்புரவு பணியாளர்கள் மூலம், பள்ளி வளாகத்தை சுத்தம் செய்ய வேண்டும். வியாழன் தோறும், பள்ளி மற்றும் வீடுகள் உள்ள பகுதிகளை சுத்தப்படுத்த வேண்டும்; அத்துடன், உறுதிமொழியும் ஏற்க வேண்டும்

 நாட்டு நலப்பணி திட்டமான, என்.எஸ்.எஸ்., - தேசிய மாணவர் படையான, என்.சி.சி., - இளம் செஞ்சிலுவை சங்கம், பசுமைப்படை, சாரண, சாரணியர் இயக்கம் ஆகியவற்றின் மூலம், பெற்றோருக்கும், மாணவர்களுக்கும், டெங்கு விழிப்புணர்வு பிரசாரம் மேற்கொள்வது அவசியம்

 மாணவர்கள் காய்ச்சலுடன் பள்ளிக்கு வந்தால், பெற்றோர் அல்லது பாதுகாவலருக்கு தெரிவித்து, அருகிலுள்ள, அரசு சுகாதார மையத்திற்கு அழைத்துச் செல்ல வேண்டும். இந்த உத்தரவுகளை, தலைமை மற்றும் ஆசிரியர்கள் பின்பற்ற வேண்டும். இவ்வாறு அதில் கூறப்பட்டுள்ளது.

2003 போராட்டம்

பொய்; உண்மையாகுமா?

"ஒரு பொய்யை பத்து முறை கூறு
உண்மை போன்று தோன்றும்"

"எப்போதுமே மக்களிடம் சின்ன பொய்யைச் சொல்லி அவர்களை ஆள்வது கடினம்.அதனால்,பெரிய பொய்களைச் சொல்லக் கற்றுக்கொள்ளுங்கள்"
-கோயபல்ஸ்

*உங்க மாநில செயலாளர் 2003 போராட்டத்தில் ஓடிவிட்டார் என ஆதாரமில்லாமல் பதிவிடும் நண்பர்களுக்கான விளக்கப்பதிவு.

2003 வரலாற்று சிறப்பு மிக்க  போராட்டத்தில் ஒரு இயக்கம் மூன்றாம் நாள் பின்வாங்கியது.குற்றச்சாட்டு வைக்கும் தமிழ்நாடு ஆரம்பப்பள்ளி ஆசிரியர் கூட்டணி இப்போது போல் தொடர்ந்து களத்தில் இருந்தது.

4-7-2003 பணிக்கு திரும்பாவிட்டால் எஸ்மா பாயும் என்றது அம்மா அரசு.அதன் விளைவாய் 1,75,000 பேர் பணி நீக்கம்.6-3-03 இரவில் நீதியரசர் தினகரன் பணி நீக்க உத்தரவு ரத்து செய்தார்.தமிழக அரசு தீர்ப்புக்கு தடையாணை பெற்றது.சிஐடியு
டி.கே.ரங்கராஜன்,எஸ்.எஸ்.தியாகராஜன்,செ.குப்புசாமி,நளினி சிதம்பரம் ஆகிய 4பேர் பொதுநல வழக்கு  தொடுத்தனர்.

16நாள் விசாரணைக்கு பின் 22 நாள் ஊதிய இழப்புடன் 6072 பேர் தவிர 1,64,169 பேர் பணியில் சேர்ந்தனர். இந்த 6072 பேரில் 999 பேர் நிரந்தர பணி நீக்கம் செய்யப்பட்டனர். பொதுச்செயலாளர் பர்வதராஜன் உட்பட
(இதில் திருப்பூர் வடக்கில் TNPTF ல் மட்டுமே இருவர் டிஸ்மிஸ்
*திரு லாரன்ஸ் நிர்மல்ராஜ்,நாராயணன்*
இருவர் மட்டுமே

உங்க பாணியில் சொல்லனும்னா.முன்னாள் பொறுப்பாளர்களை கேட்கவும்)

19-5-2004 ல் டிஸ்மிஸ் உத்தரவு ரத்து செய்யப்பட்டு பணிக்கு திரும்பினர். அப்போது TNPTF செ.நடேசன் "நல்ல சமயமிது நழுவவிட மாட்டோம்" எனும் துண்டு பிரசுரம் ஆசிரியர்கள் மனசாட்சியாக வலம்வந்தது.ஜூ.வி இதழிலும் இவரின் பேச்சு பெட்டிச் செய்தியாக வந்தது.

#இப்படிப்பட்ட போராளிகளை கொச்சைப்படுத்தும் விதமாக
உங்க பொறுப்பாளகள் 2003 ல் வரவில்லை.ஓடிவிட்டனர்.என அவதூறு பரப்புவோர்க்கு மனசாட்சி உண்டா?

#யாரோ எப்போதோ கைதட்டலுக்கு ஒரு கட்டுக்கதையை உங்களிடம் அவிழ்த்து விட்டிருப்பார்கள்.அதை இன்னுமா பிடித்து தொங்குவது

*இனியாவது கவுண்டமணியிடம் சின்னப்பையன் சொல்வானே
வெத்தல தோப்பு தெரியுமா
தோப்பு வீடாவது தெரியுமா னு
அது போல் மொட்டையாக பதிவிடாமல் ஆதாரத்துடன் பதிவிடுங்கள்

#நடுநிலை ஆசிரியர்களும், புதிய ஆசிரியர்களுக்கும் உண்மையை உரக்கச் சொல்லும் பதிவு இது

#2017 போராட்டத்தை யாரும் திரிக்க முடியாது.ஏனெனில் இப்போது இணையம் வந்துவிட்டது.

#ஆதாரத்துடன் வெளியிடுகிறேன். எதிர்ப்பவர்கள் ஆதாரத்துடன் பதிவிட வேண்டுகிறேன்

#Forward மெசேஜும் பொய்
Copy past ம் பொய்
தீர விசாரித்து டைப் பண்ணுவதே மெய்

தோழமையுடன் மணி

டோட்டோ ஸ்கூலுக்குப் போனபோது...

டோட்டோ - சானை உங்களுக்குத் தெரியுமா? தெரியாவிட்டாலும் பரவாயில்லை, டோட்டோவின் கதையைக் கேட்டால் நிச்சயம் உங்களுக்கு அவளைப் பிடிக்கும். ஏனென்றால், உங்களைப் போல என்னைப் போல நிறைய குறும்புகளைச் செய்த சேட்டைக்காரக் குழந்தை அவள்.

சுட்டிப்பெண் டோட்டோ - சான் ஒரு பள்ளியிலிருந்து விலக்கப்பட்டு சமீபத்தில்தான் புதிய பள்ளியில் சேர்ந்திருந்தாள், ஆனால் அந்த புதிய பள்ளியிலிருந்தும் அவளை வெளியேறச் சொல்லிவிட்டார்கள். இது அவள் அம்மாவுக்கு வருத்தம் தந்தது. முதல் வகுப்பிலேயே அவள் பல முறை வெளியேற்றப்பட்டுவிட்டாள். ஒரு வாரத்துக்கு முன் டோட்டோவின் கிளாஸ் டீச்சர், டோட்டோவின் அம்மாவை அழைத்திருந்தார். டோட்டோவின் அம்மாவிடம் டீச்சர் சொன்ன முதல் வாக்கியமே, "உங்கள் மகள் மொத்த கிளாஸையும் கெடுக்கிறாள். தயவுசெய்து அவளை வேறு பள்ளியில் சேர்த்துவிடுங்கள். இனிமேல் எதையும் பொறுத்துக்கொள்ள முடியாது" என்று டீச்சர் பெருமூச்சு விட்டுக்கொண்டே சொன்னாள். டோட்டோவின் அம்மா இதைக் கேட்டு திடுக்கிட்டாள். மொத்த கிளாஸையே இடையூறு செய்யும் அளவுக்கு டோட்டோ அப்படி என்ன செய்தாள் என்ற கேள்வி அவளுக்குள் எழுந்தது.

"தன் டெஸ்க்கை பல நூறு முறை அவள் திறந்து மூடுகிறாள். எதையாவது வைக்க வேண்டும், அல்லது எடுக்க வேண்டும் என்றால்தான் டெஸ்க் டிராவைத் திறக்க வேண்டும் என்று சொல்லியிருக்கிறேன். உங்கள் மகள் இதை நன்றாகப் பிடித்துக் கொண்டுவிட்டாள். அவளது நோட்டுப்புத்தகம், பென்சில் பாக்ஸ், பாடப்புத்தகம், அப்புறம் டெஸ்கில் வேறு என்ன இருக்கின்றனவோ, அவற்றை வெளியே எடுக்கிறாள். அல்லது எதையாவது உள்ளே வைக்கிறாள். ஒரு எழுத்தை எழுதி முடிப்பதற்குள் மேற்கண்ட பொருள்களை ஒவ்வொன்றாக உள்ளே வைத்துவிட்டு, அடுத்த எழுத்தை எழுவதற்கு மீண்டும் எல்லாவற்றையும் வெளியே எடுப்பாள். இவை எல்லாவற்றையும் நாம் நினைத்துப் பார்க்க முடியாத வேகத்தில் அவள் செய்வாள். இதெல்லாமே தலையைச் சுற்ற வைக்கும். ஆனால், இதற்காக அவளை நான் திட்ட முடியாது. ஏனென்றால், ஒவ்வொரு முறை டெஸ்க் மேற்பகுதியை அவள் திறப்பதற்கும் மூடுவதற்கும் காரணம் இருக்கும்." இதைச் சொன்னபோது அந்த டீச்சரின் கண் இமைகள் படபடவென இமைத்தன.

இதைக் கேட்டவுடன் டோட்டோவின் அம்மாவுக்கு, டோட்டோ ஏன் டெஸ்க் மேற்பகுதியை அடிக்கடி திறந்து மூடுகிறாள் என்பதற்கான காரணம் கொஞ்சம்கொஞ்சமாகப் புரிய ஆரம்பித்தது. இந்த புதிய பள்ளியில் இருந்து டோட்டோ முதல் நாள் வீடு திரும்பியதும் எவ்வளவு குதூகலமாக இருந்தாள் தெரியுமா? "இந்த ஸ்கூல் ரொம்ப நல்லாயிருக்கு. வீட்டில் உள்ள உன் மேஜை டிராயரை நீ இழுப்பியே, அதில் வெறும் டிராயர் மட்டும்தான் இருக்கு. ஆனா... ஸ்கூலில் உள்ள டெஸ்க்கின் மேல் பகுதியை அப்படியே தூக்கிவிடலாம்... அந்த டெஸ்க் ஒரு பெட்டி மாதிரி இருக்கும். அதில் எல்லா பொருளையும் வைத்துக்கொள்ள முடியும். அது எவ்வளவு சூப்பரா இருக்கு தெரியுமா?" என்று டோட்டோ சொன்னது அவள் அம்மாவுக்கு ஞாபகம் வந்தது. புதிய டெஸ்கின் மேல் பகுதியை டோட்டோ சந்தோஷமாகத் திறந்து மூடிய காட்சி அம்மாவின் மனதுக்குள் ஓடியது. டெஸ்கின் மேற்பகுதியைத் திறந்து மூடுவது அப்படியொன்றும் பெரிய குறும்புத்தனமாக அம்மாவுக்குத் தோன்றவில்லை. அப்படிச் செய்து பார்ப்பதில் உள்ள புதுமை சலித்துப் போனவுடன், இப்படிச் செய்வதை டோட்டோ விட்டுவிடலாம் என்றே அம்மாவுக்குத் தோன்றியது.

அதே நேரம், "இது மட்டும் என்றால்கூட, நான் இவ்வளவு பெரிசு படுத்தியிருக்க மாட்டேன். டெஸ்கை மூடித் திறக்கும் நேரம் போக, கிளாஸ் நடக்கும் மற்ற எல்லா நேரமும் டோட்டோ நின்றுகொண்டே இருப்பாள்," என்றாள் அந்த டீச்சர். "எழுந்து நிற்கிறாளா, எங்கே?" என்று அம்மா ஆச்சரியத்துடன் கேட்டாள். "ஜன்னலில்தான். அப்பொழுதுதானே தெருவில் இருக்கும் இசைக்கலைஞர்களைக் கூப்பிட முடியும்?" - அந்த டீச்சர் கிட்டத்தட்ட அலறினாள். அதன் பிறகு டீச்சர் சொன்ன கதை இதுதான்: கிட்டத்தட்ட ஒரு மணி நேரத்துக்கு டெஸ்கின் மேல் பகுதியைத் திறந்து மூடிய பிறகு, டோட்டோ ஜன்னலருகே நின்று தெருவை வேடிக்கை பார்ப்பாள். சரி, டெஸ்கைத் திறந்து மூடி சத்தம் போடாதவரை நல்லது என்று நான் நினைக்கும்போது, வெளியே அலங்காரமாக ஆடை அணிந்து நடந்து செல்லும் தெரு இசைக்கலைஞர்களை டோட்டோ திடீரெனக் கத்திக் கூப்பிடுவாள். எங்களது கிளாஸ் தெருவுக்குப் பக்கத்தில் இருப்பதால், தெருவில் போகிறவர்களிடம் ஜன்னல் வழியே பேச முடியும். டோட்டோ கூப்பிட்டவுடன் இசைக்கலைஞர்கள் ஜன்னலுக்கு அருகே நின்றுவிடுவார்கள்.

"அதோ அவர்கள் வந்துவிட்டார்கள்," என்று டோட்டோ சப்தமாகக் கத்துவாள். உடனே, கிளாஸில் இருக்கும் எல்லாக் குழந்தைகளும் ஜன்னலருகே குழுமிவிடுவார்கள். "எங்களுக்கு வாசித்துக் காட்டுங்கள்" என்று டோட்டோ சொன்னவுடன், ஒரு கச்சேரி நடக்கும். அது முடியும்வரை நான் கிளாஸ் எடுப்பதை நிறுத்திவிட்டு பேசாமல் நிற்பேன். அவர்கள் போன பின், எல்லாக் குழந்தைகளும் தங்கள் டெஸ்குக்குத் திரும்பிவிடுவார்கள். ஆனால், டோட்டோ மட்டும் ஜன்னல் அருகேயே நின்றுகொண்டு, "இன்னொரு இசைக்குழு இந்த வழியே வரலாம். அவர்களை நாம் கவனிக்கத் தவறிவிட்டால், அவமானம் இல்லையா?" என்று டோட்டோ பதில் சொல்லுவாள். "இப்போது உங்களுக்குப் புரியும் என்று நினைக்கிறேன். இது கிளாஸுக்கு எவ்வளவு பெரிய தொந்தரவு" என்று டீச்சர் உணர்ச்சி பொங்கச் சொல்லிக்கொண்டிருந்தாள். "டோட்டோ வேறு என்ன செய்தாள்?" என்று அம்மா கேட்க, "வேறு என்ன செய்யவில்லை?" என்று டீச்சர் உரக்கக் கத்தினாள். இப்படியாக டோட்டோ, அந்தப் பள்ளியில் இருந்தும் வெளியேற்றப்பட்டாள். இது போன்ற சம்பவங்கள் காரணமாக டோட்டோவுக்கு தாழ்வு மனப்பான்மை ஏற்பட்டுவிடக் கூடாது என்று அவளுடைய அம்மா நினைத்தாள். அது மட்டுமில்லாமல், தனது சின்னக் குழந்தையைப் புரிந்துகொள்ளும் பள்ளியை டோட்டோவின் அம்மா தேடிக் கண்டுபிடித்தார். அந்தப் பள்ளிதான் டோமாயி. அந்தப் பள்ளியை நடத்தியவர் கோபயாஷி.

டோமாயி பள்ளியில் காலி ரயில் பெட்டிகள்தான் கிளாஸ் ரூம். கிளாஸ்ரூமே இவ்வளவு சுவாரசியமாக இருக்கும் அந்த ஸ்கூலில் பாடங்களோ, பரீட்சைகளோ, அடியோ, திட்டோ கிடையாது. ஒவ்வொரு குழந்தையும் எந்த விஷயத்தைக் கற்றுக்கொள்ள ஆசைப்படுகிறதோ, அதை அவர்களுக்கு உரிய வேகத்தில் கற்றுத் தரும் பள்ளிதான் டோமாயி. டோட்டோவின் உண்மைப் பெயர் டெட்சுகோ குரோயாநாகி. அவள் பெரியவள் ஆனவுடன் உலகப் புகழ்பெற்ற டிவி நிகழ்ச்சித் தொகுப்பாளராகவும் யுனிசெப் அமைப்பின் நல்லெண்ணத் தூதராகவும் ஆனார். அதற்கு டோமாயி பள்ளியும், அதை நடத்திய கோபயாஷியும்தான் முக்கியக் காரணம் என்றும் அவர் கூறியுள்ளார். இந்த விஷயங்கள் அனைத்தையும் "டோட்டோ சான் - ஜன்னலில் ஒரு சிறுமி" என்ற பெயரில் அவர் புத்தகமாக எழுதியுள்ளார். அது வெளியான இரண்டு வருடத்தில் ஜப்பானிய மொழியில் 50 லட்சம் பிரதிகள் விற்றது. உலகப் புகழ்பெற்ற இந்தப் புத்தகம் பல்வேறு உலக மொழிகளில் மொழிபெயர்க்கப்பட்டுள்ளது. டோட்டோ படித்த டோமாயி பள்ளியைப் போன்ற ஒரு ஸ்கூல் நமக்கும் இருந்தால், நிச்சயம் ஜாலியாக இருக்கும், இல்லையா?

நிதி உதவி பெறும் பள்ளி - உபரி ஆசிரியர்கள் - ஊ.ஒ.பள்ளிகளுக்கு மாவட்டத்திற்குள் / மாவட்டம் விட்டு மாவட்டம் தற்காலிக அடிப்படையில் மாற்றுப்பணி - 2017- 2018 ஆண்டிற்கு மட்டும் சார்ந்த ஆசிரியரின் விருப்பம் சார்ந்து மாற்றுப் பணிபுரிய ஆணை வழங்குதல் - தொடக்கக் கல்வி இயக்குநரின் செயல்முறை

எம்ஜிஆர் நூற்றாண்டு விழா: 11, 12ம் வகுப்பு மாணவர்களுக்கு பேச்சு போட்டி

தமிழக அரசு நேற்று வெளியிட்டுள்ள அறிக்கை: எம்.ஜி.ஆரின் நூற்றாண்டு விழாவை முன்னிட்டுதமிழ் வளர்ச்சி துறையின் தமிழ் மன்றம் சார்பில் மாநிலம் முழுவதும் நாளை மறுதினம் (6ம் தேதி) 11, 12ம் வகுப்பு பயிலும் பள்ளி மாணவர்களுக்கு கவிதை, கட்டுரை, பேச்சு போட்டிகள் நடத்தி பரிசுகள் வழங்கப்பட உள்ளன. போட்டியில் கலந்துகொள்ளும் மாணவர்கள் பயிலும் பள்ளி தலைமையாசிரியரிடம் உரிய படிவத்தில் பரிந்துரையை பெற்று, போட்டி நாளன்று மாவட்ட தமிழ் வளர்ச்சி துணை அல்லது உதவி இயக்குநர்களிடம் நேரில் அளிக்க வேண்டும்.

போட்டி விதிமுறைகள், விண்ணப்ப படிவம் தமிழ் வளர்ச்சித் துறையின் www.tamilvalarchithurai.org என்ற வலைதளத்தில் இலவசமாக பதிவிறக்கம் செய்துகொள்ளலாம். போட்டிக்கான தலைப்புகள் போட்டி தொடங்கும்போது அறிவிக்கப்படும். போட்டி முடிவுகள் அன்றே அறிவிக்கப்படும். போட்டியில் வெற்றிபெறும் மாணவர்களுக்கு முதல் பரிசாக ரூ.10 ஆயிரமும், இரண்டாம் பரிசாக ரூ.7 ஆயிரமும், மூன்றாம் பரிசாக ரூ.5 ஆயிரம் மற்றும் சான்றிதழும் வழங்கப்படும்.

போட்டி தேர்வுகளுக்கு தமிழக மாணவர்களை தயார்படுத்த கல்வித்துறை இணை இயக்குநர்கள் 10 பேர் வெளிமாநிலங்களில் ஆய்வு

போட்டித் தேர்வுகளுக்கு தமிழக மாணவர்களை தயார்படுத்த தமிழக பள்ளிக் கல்வித்துறை இணை இயக்குநர்கள் 10 பேர் கொண்ட குழுவினர் வெளி மாநிலங்களில் ஆய்வு மேற்கொண்டு அதன் அறிக்கையை அரசிடம் தாக்கல் செய்துள்ளனர். மருத்துவப் படிப்புக்கு நீட் தேர்வு அவசியம் என்பதை மத்திய அரசு அறிவித்துள்ளது. இதற்கு தமிழகத்தில் கடும் எதிர்ப்பு எழுந்துள்ள நிலையில், நீட் மற்றும் ஐஐடி, ஜேஇஇ, ஐஐஎம் உட்பட நுழைவுத்தேர்வு மற்றும் வேலைவாய்ப்புக்கான போட்டித் தேர்வுகளை தமிழக மாணவர்கள் எதிர்கொள்வதற்கான நடவடிக்கைகளை தமிழக அரசு மேற்கொண்டு வருகிறது.

இதற்காக சிபிஎஸ்இ, என்சிஇஆர்டி பாடத்திட்டங்களுக்கு ஏற்ப தமிழகத்தில் 1 முதல் 10ம் வகுப்பு வரையிலான பாடத்திட்டங்களை மாற்றியமைக்கும் நடவடிக்கைகள் தொடங்கியுள்ளன. மேலும், மகாராஷ்டிரா, ராஜஸ்தான், ஆந்திரா போன்ற மாநிலங்கள் பிளஸ்-1 வகுப்பிலேயே நீட், ஐஐடி, ஐஐஎம், ஜேஇஇ தேர்வுகளுக்கு மாணவர்களை தயார்படுத்தி வருகின்றன. அதேபோல் தமிழக மாணவர்களை தயார்படுத்தும் வகையில் தமிழக கல்வித்துறையை சேர்ந்த இணை இயக்குநர்கள் 10 பேர் டெல்லி, கேரளா, ஆந்திரா, ராஜஸ்தான், குஜராத், மகாராஷ்டிரா, தெலங்கானா போன்ற பல்வேறு மாநிலங்களுக்கு அனுப்பி வைக்கப்பட்டனர். அதன்படி, இணை இயக்குநர் நாகராஜமுருகன் டெல்லிக்கும், பொன்குமார் மகாராஷ்டிராவுக்கும், செல்வகுமார் குஜராத்துக்கும், குப்புசாமி ராஜஸ்தானுக்கும், குமார் தெலங்கானாவுக்கும், ரமேஷ் ஆந்திராவுக்கும், பாஸ்கர சேதுபதி கேரளாவுக்கும் சென்று ஆய்வு மேற்கொண்டனர்.

இவர்கள் அங்குள்ள பாடத்திட்டங்கள் குறித்தும், போட்டித்தேர்வுகளுக்கு அரசின் சார்பில் மேற்கொள்ளப்படும் பணிகள் மற்றும் அங்கு சிறப்பாக செயல்பட்டு வரும் தனியார் போட்டித்தேர்வு பயிற்சி மையங்களையும் ஆய்வு செய்தனர். இவர்கள் தங்களது ஆய்வு அறிக்கையை தமிழக அரசிடம் கடந்த வாரம் தாக்கல் செய்துள்ளனர். இதன் அடிப்படையில் தமிழக மாணவர்களை நீட் உட்பட போட்டித் தேர்வுகளுக்கு தயார்படுத்தும் செயல்முறைகள் உருவாக்கப்படும் என்று அதிகாரிகள் தெரிவித்தனர்.