அரசுப் பள்ளிகளில் பயிலும் மாணவர்களின் விவரங்களை சமர்ப்பிக்க அவகாசம் வேண்டும்: தலைமை ஆசிரியர்கள் கோரிக்கை

அரசுப் பள்ளிகளில் படிக்கும் மாணவ, மாணவிகள் சார்ந்த தகவல் தொகுப்பு விவரங்களை சமர்ப்பிக்க உரிய கால அவகாசம் வேண்டும் என தலைமை ஆசிரியர்கள் கோரிக்கை விடுத்துள்ளனர்.

தமிழகம் முழுவதும் உள்ள அரசுப் பள்ளிகளில் படிக்கும் மாணவ, மாணவிகள் சார்ந்த தகவல் தொகுப்பு விவரங்கள் ஆண்டுதோறும் கல்வி தகவல் மேலாண்மை முறையில்(இஎம்ஐஎஸ்) இணையதளத்தில் பதிவேற்றம் செய்யப்படுகிறது. இதன் மூலம் மாணவ, மாணவிகளுக்கு வழங்கப்படும் குறியீட்டு எண் மூலம் அவரின் முழுமையான விவரங்களை அறிய முடியும். இந்த திட்டத்தை கல்வித்துறை கடந்த சில ஆண்டுகளாக மேற்கொண்டு வருகிறது. அதன்படி, 2015-16-ஆம் கல்வியாண்டிற்கான, மாணவ, மாணவிகளின் தகவல் தொகுப்பு விவரங்களை பதிவுசெய்ய அறிவுறுத்தப்பட்டிருந்தது.

அந்தந்த மாவட்டங்களில் செயல்படும் அரசு உதவிபெறும், சுயநிதி, மத்திய அரசுப்பாடத்திட்டத்தின் கீழ் செயல்படும் பள்ளிகள், செவ்வாய்கிழமைக்குள் (மே 10) இந்த விவரங்களை மின்னஞ்சல் மூலம் இடைநிலைக் கல்வி இணை இயக்குநருக்கு அனுப்பி வைக்க வேண்டும் என்று கல்வித்துறை உத்தரவிட்டிருந்தது. ஆனால், விவரங்களை பதிவு செய்ய கால அவகாசம் போதவில்லை என்று தலைமை ஆசிரியர்கள் கூறுகின்றனர். இது குறித்து தலைமை ஆசிரியர்கள் சிலர் கூறியதாவது:-

இந்தத் தகவல் தொகுப்பில், மாணவர்களின் புகைப்படங்கள் அண்மைக்கால படங்களாக மாற்றப்பட வேண்டும். அத்துடன் பள்ளியளவில் மாற்றம் செய்த மாணவர்களின் விவரங்களில் ஏற்படும் குழப்பம் தவிர்க்கப்பட வேண்டும். இவற்றை எங்களுக்கு வழங்கப்பட்ட 4 நாள்களில் முடிக்க முடியாது. எனவே, இப்பணிகளை நிறைவு செய்ய கூடுதல் கால அவகாசம் வழங்க வேண்டும். அல்லது பள்ளிகள் திறந்தபின் ஜூலை, ஆகஸ்ட் மாதங்களில் இப்பணிகளை மேற்கொண்டால் துல்லியமான விவரங்கள் அளிக்க முடியும் என்றனர்.

144 தடை உத்தரவு கிடையாது ராஜேஷ் லக்கானி திட்டவட்டம்

'தமிழகத்தில், சட்டசபை தேர்தலை ஒட்டி, 144 தடையுத்தரவு பிறப்பிக்கப்படாது,'' என, தமிழக தலைமை தேர்தல் அதிகாரி ராஜேஷ் லக்கானி தெரிவித்தார். இது குறித்து, அவர் கூறியதாவது:ஓட்டுப்பதிவுக்கு அனைத்து ஏற்பாடுகளும் தயார். பாதுகாப்பு பணிக்கு, 68 கம்பெனி, மத்திய ரிசர்வ் போலீசார்; 64 கம்பெனி, எல்லை பாதுகாப்பு படை; 71 கம்பெனி, மத்திய தொழில் பாதுகாப்பு படை; 20 கம்பெனி, இந்திய - திபெத் பாதுகாப்பு படையினர்; 33 கம்பெனி, சிறப்பு பாதுகாப்பு படை; 20 கம்பெனி, ரயில்வே பாதுகாப்பு படை வீரர்கள் வந்துள்ளனர். எனவே, 144 தடையுத்தரவு பிறப்பிக்கப்பட மாட்டாது. கோவா, மஹாராஷ்டிரா, தெலுங்கானா, ஆந்திரா ஆகிய மாநிலங்களில் இருந்து, 22 கம்பெனி, துணை ராணுவ வீரர்கள் வர உள்ளனர்.

வாக்காளர் அடையாள அட்டைக்கு மாற்று ஆவணங்கள் அறிவிப்பு

சட்டசபை தேர்தலில், வாக்காளர்கள் அடையாள அட்டையாக, 11 ஆவணங்களை பயன்படுத்த, தேர்தல் கமிஷன் அனுமதி அளித்துள்ளது.சட்டசபை தேர்தலில், ஓட்டு போட செல்லும் வாக்காளர்கள், தங்களுடைய அடையாளத்தை மெய்ப்பிப்பதற்கு, வாக்காளர் புகைப்பட அடையாள அட்டையை அளிக்க வேண்டும்.

அதை அளிக்க இயலாதவர்கள், தங்களின் அடையாளத்தை மெய்ப்பிக்க, மாற்று புகைப்பட அடையாள ஆவணமாக, 11 ஆவணங்களில், ஏதேனும் ஒன்றை காண்பிக்கலாம். அவற்றின் விவரம்:

* கடவுச்சீட்டு (பாஸ்போர்ட்)
* ஓட்டுனர் உரிமம்
* மத்திய, மாநில அரசின் பொதுத்துறை நிறுவனங்களால், தொழிலாளர்களுக்கு வழங்கப்பட்ட, புகைப்படத்துடன் கூடிய பணி அடையாள அட்டை
* வங்கி அல்லது அஞ்சலக கணக்கு புத்தகம் (புகைப்படத்துடன் கூடியது)
* பான்கார்டு
* தேசிய மக்கள் தொகை பதிவேட்டின் கீழ், இந்திய தலைமைப் பதிவாளரால் வழங்கப்பட்ட ஸ்மார்ட் கார்டு
* மகாத்மா காந்தி தேசிய ஊரக வேலை உறுதியளிப்பு திட்டத்தின் பணி அட்டை * தொழிலாளர் நல அமைச்சக திட்டத்தின் கீழ் வழங்கப்பட்ட மருத்துவ காப்பீட்டு ஸ்மார்ட் கார்டு
* புகைப்படத்துடன் கூடிய ஓய்வூதிய ஆவணம்
* தேர்தல் நிர்வாகத்தினரால் வழங்கப்பட்ட, அனுமதியளிக்கப்பட்ட வாக்காளர் புகைப்படச் சீட்டு
* லோக்சபா, சட்டசபை, சட்ட மேலவை உறுப்பினர்களுக்கு வழங்கப்பட்டுள்ள, அலுவலக அடையாள அட்டை

இத்தனை ஆவணங்கள் இருந்தாலும், வாக்காளர் பட்டியலில் பெயர் இருந்தால் மட்டுமே, அவர் ஓட்டு போட முடியும்.

தபால் ஓட்டு செலவு குறைக்க தேர்தல் கமிஷன் புது முயற்சி

தபால் செலவை குறைக்க, அனைத்து தொகுதிகளிலும் தபால் ஓட்டுப்பதிவு மையம் அமைக்க, தேர்தல் கமிஷன் உத்தரவிட்டுள்ளது. அரசு அலுவலர்கள் தேர்தலில் தபால் மூலமாக, தங்கள் ஓட்டுக்களை பதிவு செய்கின்றனர்.

ஓட்டை பதிவு செய்து, சம்பந்தப்பட்ட தொகுதிக்கு அனுப்புவது வழக்கமாக உள்ளது. தபால் ஓட்டுக்களை, அஞ்சல் துறை மூலமாக அனுப்புவதால் அதிக செலவு ஏற்படுகிறது. செலவை கட்டுப்படுத்த, தபால் ஓட்டுப்பதிவுக்கு, சேவை மையம் அமைக்க, தேர்தல் கமிஷன் உத்தரவிட்டுள்ளது. தேர்தல் பிரிவு அதிகாரிகள் கூறியதாவது: தபால் ஓட்டு நடவடிக்கையால், தொகுதிக்கு, 50 ஆயிரம் ரூபாய் வரை செலவு ஏற்படுகிறது. செலவை குறைக்க, ஒவ்வொரு தொகுதியிலும் தபால் ஓட்டுப்பதிவு சேவை மையம் அமைக்க, உத்தரவிடப்பட்டுள்ளது.

இதன்படி, தொகுதியில் பணியாற்றும் அரசு அலுவலர்களுக்கு, ஓட்டுச்சீட்டு வழங்கப்படும். 'சீல்' வைத்த பெட்டியில் ஓட்டுச்சீட்டு அடங்கிய தபால் உறை பெறப்படும். பின், அந்தந்த தொகுதிகளுக்கான தேர்தல் நடத்தும் அலுவலருக்கு அனுப்பப்படும். இதனால், தேர்தல் அலுவலர்களின் சிரமம் குறையும்; தபால் ஓட்டுப்பதிவு, 100 சதவீதம் நடக்கும். இவ்வாறு, அவர்கள் கூறினர்.

Annamalai university may-2016 hall ticket

Click below

http://www.annamalaiuniversity.ac.in/dde/coe_hallticket.php

234 தொகுதிகள் உருவானது எப்படி?

இந்தியா சுதந்திரம் பெற்ற பிறகு, இந்திய அரசியல் அமைப்பு சட்டத்தின் அடிப்படையில், 1952ம் ஆண்டு, முதல் பொதுத்தேர்தல் நடந்தது. இந்த தேர்தல், முந்தைய மதராஸ் பிரசிடென்சியை உள்ளடக்கியதாக நடந்தது.

இதில் தமிழகம், ஆந்திரா, கர்நாடகா, கேரளா, ஆகிய மாநிலங்களின் பல பகுதிகள் இடம் பெற்றன. மொத்தம், 375 தொகுதிகளைக் கொண்டிருந்தது. தமிழகத்தில், 188 தொகுதிகள் இடம் பெற்றிருந்தன. அதன்பின், 1957ம் ஆண்டு மாநிலங்கள் சீரமைப்புக்கு பின், மதராஸ் மாகாண சட்டசபை, 205 உறுப்பினர்களைக் கொண்டதாக இருந்தது. இதில், 130 ஒற்றை உறுப்பினர் தொகுதிகள், 37 இரட்டை உறுப்பினர் தொகுதி கள் இருந்தன. ஒருவர் நியமன உறுப்பினர்.

அடுத்து, 1962ம் ஆண்டு தேர்தலில், இரு உறுப்பினர் தொகுதிகள் நீக்கப்பட்டு, 38 கூடுதல் ஒரு உறுப்பினர் தொகுதிகள் உருவாக்கப்பட்டன. இவற்றில், 37 தொகுதிகள் தாழ்த்தப்பட்டோருக்கும், ஒரு தொகுதி பழங்குடியினருக்கும் ஒதுக்கீடு செய்யப்பட்டது.

அந்த ஆண்டு பிப்ரவரி மாதம் நடந்த, பொதுத் தேர்தலை தொடர்ந்து, மார்ச், 3ம் தேதி, மூன்றாவது சட்டசபை அமைக்கப்பட்டது. 1965ம் ஆண்டு தொகுதி சீரமைப்பு நடவடிக்கைகளின் விளைவாக, சென்னை மாகாண சட்டசபை உறுப்பினர்கள் எண்ணிக்கை, 234ஆக உயர்த்தப்பட்டது.

இவற்றில், 42 தொகுதிகள், தாழ்த்தப்பட்டோருக்கும், இரண்டு தொகுதிகள் பழங்குடியினருக்கும் ஒதுக்கீடு செய்யப்பட்டன. கூடுதலாக ஒரு இடத்திற்கு, ஆங்கிலோ - இந்திய உறுப்பினர் நியமனம் செய்யப்பட்டார்.

தொடர்ந்து, 1969ம் ஆண்டு ஜனவரி, 14ம் தேதி, மதராஸ் மாநிலம், தமிழ்நாடு மாநிலமாக பெயர் மாற்றம் செய்யப்பட்டது. எட்டாவது சட்டசபை, 1985 ஜனவரி 16ல் அமைக்கப்பட்டது. இதற்கான பொதுத்தேர்தல், 1984 டிசம்பர் மாதம் நடந்தது.

எட்டாவது சட்டசபையில், 1986 மே, 14ம் தேதி, சட்ட மேலவையை நீக்கும் அரசு தீர்மானம் நிறைவேற்றப்பட்டது. இதன்மூலம், தமிழக சட்ட மேலவை, 1986 நவ., 1ம் தேதி முதல் அடியோடு ரத்து செய்யப்பட்டது. 14வது சட்டசபை தற்போது முடிந்துள்ளது. நடைபெற உள்ள தேர்தலில், வெற்றி பெறும் கட்சி அமைக்கப் போவது, 15வது சட்டசபை.

மே 5 முதல் 'பூத் சிலிப்' வினியோகம்

வாக்காளர்களுக்கு, 'பூத் சிலிப்' வரும், 5ம் தேதி முதல், வீடு வீடாகச் சென்று வழங்கப்படும்,'' என, தமிழகத் தலைமை தேர்தல் அதிகாரி ராஜேஷ் லக்கானி தெரிவித்தார்.இது குறித்து, அவர் மேலும் கூறியதாவது:

தமிழகத்தில் உள்ள அனைத்து வாக்காளர்களுக்கும், புகைப்படத்துடன் கூடிய, பூத் சிலிப் அச்சிடும் பணி முடிந்துள்ளது. அனைத்து வாக்காளர்களுக்கும், மே 5ம் தேதி முதல் பூத் சிலிப் வழங்கப்படும். ஓட்டுச்சாவடி அலுவலர்கள், வீடு வீடாகச் சென்று வழங்குவர். வாக்காளர் அடையாள அட்டை பெற விரும்புவோர், தேர்தல் கமிஷன் இணையதளத்தில், விரைவு தபால் மூலம் பெற விண்ணப்பிக்கலாம்.

வாக்காளர்களில், இரண்டு கோடி பேரின் மொபைல் போன் எண், தேர்தல் கமிஷனிடம் உள்ளது. அவர்களுக்கு, வாக்காளர் வரிசை எண், பாகம் எண், ஓட்டுச்சாவடி அமைந்துள்ள இடம் போன்ற விவரம், இன்று முதல், எஸ்.எம்.எஸ்., மூலம் அனுப்பி வைக்கப்படும். இவ்வாறு லக்கானி தெரிவித்தார்.

மாணவ, மாணவியருக்கு உளவியல் ஆலோசனை:வருகிறது மேலும் 7 புதிய நடமாடும் மையம்

தமிழகத்தில், அரசு பள்ளி மாணவ, மாணவியருக்கு உளவியல் ஆலோசனை வழங்குவதற்காக, மேலும், ஏழு நடமாடும் மருத்துவ ஆலோசனை வாகனம் வாங்குவதற்கான நடவடிக்கை எடுக்கப்பட்டுள்ளது.

தமிழகத்தில், அரசு பள்ளிகளில் படிக்கும் மாணவ, மாணவியரின் கல்விக் கட்டணத்தில், மருத்துவக்கட்டணமாக தலா, ஒரு ரூபாய் ஒதுக்கப்படுகிறது. இந்நிதி நீண்டநாட்களாக பயன்படாமல் வைக்கப்பட்டிருந்த நிலையில், கடந்த இரு ஆண்டுகளுக்கு முன், நடமாடும் மருத்துவ ஆலோசனை வாகனங்கள் கொள்முதல் செய்யப்பட்டன. தமிழகம் முழுவதும், 10 வாகனங்களில், தலா ஒரு உளவியல் ஆலோசகர் நியமிக்கப்பட்டு, 9ம் வகுப்பு முதல், பிளஸ் 2 வரை, படிக்கும் மாணவ, மாணவியருக்கு ஆலோசனை வழங்கப்பட்டு வந்தது.

தற்போது, மூன்றுமாவட்டங்களுக்கு, ஒரு ஆலோசனை வாகனம் செயல்பட்டு வருகிறது. இந்நிலையில், நடப்பு கல்வியாண்டில், மேலும் ஏழு வாகனங்கள் கொள்முதல் செய்ய நடவடிக்கை எடுக்கப்பட்டுள்ளது. இதன் மூலம், இரண்டு மாவட்டங்களுக்கு, ஒரு நடமாடும் ஆலோசனை வாகனம் என்ற நிலை மாறும். இதன் மூலம், இன்னும் கூடுதலாக மாணவ, மாணவியருக்கு ஆலோசனை வழங்கும் நிலை உருவாகியுள்ளது.

புத்தக சுமையை குறைக்க நடவடிக்கை:பள்ளிகளுக்கு சி.பி.எஸ்.இ., எச்சரிக்கை

'தேவையற்ற புத்தகங்களை குழந்தைகளுக்கு வழங்க வேண்டாம்' என, மத்திய இடைநிலை கல்வி வாரியமான சி.பி.எஸ்.இ., அறிவித்துள்ளது.சி.பி.எஸ்.இ., பள்ளி களில், ஏப்., 1 முதல் புதிய கல்வி ஆண்டுக்கான வகுப்பு கள் நடந்து வருகின்றன.

பாடத்திட்ட புத்தகங்கள் மட்டுமின்றி கூடுதல் புத்தகங்களும் வாங்க, மாணவர்களை பல பள்ளிகள் கட்டாயப்படுத்துகின்றன. இந்த நிலையில், அனைத்து பள்ளிகளுக்கும், சி.பி.எஸ்.இ., சார்பில் சுற்றறிக்கை அனுப்பப்பட்டு உள்ளது. சுற்றறிக்கை விவரம்:அனைத்து பள்ளிகளிலும் புத்தக சுமையை குறைக்க நடவடிக்கை எடுக்க வேண்டும். பாடத்திட்டப்படி மட்டுமே புத்தகங்களை கொண்டு வர, மாணவர்களுக்கு அறிவுறுத்த வேண்டும். பாடத்திட்டத்திற்கு தேவையில்லாத விளக்க புத்தகங்களை, பள்ளிகளுக்கு கொண்டு வர கட்டாயப்படுத்த வேண்டாம்.

இரண்டாம் வகுப்பு வரை, மாணவர்களின் புத்தகங்களை வகுப்பறையில் வைத்து இருந்து, பாட வேளைகளில் மட்டுமே கொடுக்க வேண்டும். வகுப்பறைகளில் நுாலகம் வைத்து, மாணவருக்கு படிக்கும் பழக்கத்தை ஏற்படுத்த வேண்டும்.மாணவர்களுக்கு உடல் ரீதியாக எந்த பாதிப்பும் ஏற்படாத வகையில், அவர்கள் வீட்டில் இருந்து வரும் போது புத்தக சுமையை குறைக்க, பெற்றோருக்கு அறிவுறுத்துவதுடன், தொடர் மதிப்பீட்டு முறையை சரியாக செயல்படுத்த வேண்டும்.இவ்வாறு சுற்றறிக்கையில் கூறப்பட்டு உள்ளது

வாக்காளர் பட்டியலில் நேற்று 29.4.16 முதல் வரிசை எண் மாறியுள்ளது, சரி பார்த்துக் கொள்ளவும்

Click below

http://electoralservicessearch.azurewebsites.net/searchbyname.aspx

அரசு கலை, அறிவியல் கல்லூரிகளில் மே 2 முதல் விண்ணப்பங்கள் விநியோகம்

அரசு கலை, அறிவியல் கல்லூரிகளில் 2016-17 கல்வி ஆண்டு மாணவர் சேர்க்கைக்கான விண்ணப்பங்கள் மே 2-ஆம் தேதி முதல் வழங்கப்பட உள்ளன. பிளஸ்-2 தேர்வு முடிவுகள் வெளியான அடுத்த 10 நாள்கள் வரை விண்ணப்பங்கள் விநியோகிக்கப்பட உள்ளன.

தமிழகம் முழுவதும் 62 அரசு கலை, அறிவியல் கல்லூரிகள் இயங்கி வருகின்றன. இந்தக் கல்லூரிகளில் 2016-17-ஆம் கல்வியாண்டுக்கு மாணவர் சேர்க்கைக்கான விண்ணப்ப விநியோகம் மே 2-ஆம் தேதி முதல் தொடங்கப்பட உள்ளது. விண்ணப்பக் கட்டணம் ரூ. 25, பதிவுக் கட்டணம் ரூ. 2 என மொத்தம் ரூ. 27 செலுத்தி விண்ணப்பத்தைப் பெற்றுக் கொள்ளலாம் என கல்லூரி முதல்வர்கள் தெரிவித்தனர்.

முன்கூட்டியே மாணவர் சேர்க்கை...:

பிளஸ்-2 தேர்வில் அதிக மதிப்பெண் எடுக்கக் கூடிய மாணவர்களை ஈர்க்கும் வகையில் அரசு கலை, அறிவியல் கல்லூரிகளில் கடந்த ஆண்டு முதல் முன்கூட்டியே மாணவர் சேர்க்கை நடத்தப்பட்டு வருகிறது. அதற்காக கடந்த ஆண்டு மே 4-ஆம் தேதி முதல் விண்ணப்ப விநியோகம் செய்யப்பட்டது. அதுபோல நிகழாண்டும் மே 2-ஆம் தேதியே விண்ணப்ப விநியோகத்தைத் தொடங்கி, சேர்க்கையையும் விரைவாக நடத்தி முடிக்க அரசு கல்லூரிகள் திட்டமிட்டுள்ளன.

கட்டணம் முறைப்படுத்தப்படுமா?: அரசு உதவி பெறும் மற்றும் சுயநிதி கலை - அறிவியல் கல்லூரிகளில் ரூ. 250 முதல் ரூ. 500 வரை விண்ணப்ப கட்டணம் வசூலிக்கப்படுவதாக ஆண்டுக்கு ஆண்டு புகார்கள் எழுந்து வருகின்றன. இதைத் தடுக்க கல்லூரி கல்வி இயக்குநர் அலுவலகம் நடவடிக்கை எடுக்குமா என்ற எதிர்பார்ப்பு எழுந்துள்ளது.

இ.பி.எப்., வட்டி 8.8 சதவீதம்

தொழிலாளர் வருங்கால வைப்பு நிதிக்கான வட்டியை, மத்திய அரசு, மீண்டும் 8.8 சத வீதமாக உயர்த்தியது.இ.பி.எப்., வட்டி விகிதத்தை, 2015 - 16ம் நிதியாண்டுக்கு, 8.8 சதவீதமாக, மத்திய தொழிலாளர் நலத்துறை அமைச்சர் பண்டாரு தத்தாத்ரேயா தலைமையிலான மத்திய வாரியம் பரிந்துரைத்தது.ஆனால், அதற்கு மாறாக, இ.பி.எப்., தொகைக்கு 8.7 சதவீத வட்டியை மட்டும் வழங்குவதற்கு மத்திய நிதியமைச்சகம், சில நாட்களுக்கு முன், ஒப்புதல் அளித்தது. இதனை கண்டித்து, நாடு முழுவதும் தொழிற் சங்கங்கள் எதிர்ப்பு தெரிவித்து போராட்டம் நடத்தின. இதையடுத்து, இ.பி.எப்., வட்டியை, 8.7 சதவீதத்தில் இருந்து 8.8 சதவீதமாக உயர்த்த, மத்திய அரசு ஒப்புதல் அளித்துள்ளது.

தபால் ஓட்டுகளில் மீண்டும் குளறுபடி : செல்லாதவை அதிகரிக்கும் அபாயம்

தேர்தல் கமிஷன் குளறுபடியால், நடப்பு ஆண்டும், தபால் ஓட்டுகளில், செல்லாத ஓட்டுகள் அதிகரிக்கும் அபாயம் உருவாகியுள்ளது.தமிழகம் முழுவதும், சட்டசபை தேர்தல் பணிகளுக்காக, 3 லட்சத்துக்கும் மேற்பட்ட ஆசிரியர்கள் மற்றும் அரசு ஊழியர்கள் நியமிக்கப்பட்டுள்ளனர்.

அவர்கள், தங்கள் ஓட்டை, தபால் ஓட்டு மூலம் செலுத்துகின்றனர். கடந்த தேர்தல்களில், தாமதமாக படிவங்கள் வழங்கப்பட்டதால், பலர், தபால் ஓட்டு போட முடியாத நிலை உருவானது. இதனால், அதற்கான படிவங்களை முன்னதாகவே வழங்க வேண்டும் என, கோரிக்கை விடுக்கப்பட்டது. அதற்கேற்ப, ஏப்., 24ம் தேதி நடந்த முதல் தேர்தல் பயிற்சியின் போதே, ஆசிரியர்களுக்கு தபால் ஓட்டு படிவங்கள் வழங்கப்பட்டன. அதில், வாக்காளர் பட்டியலில் உள்ள வரிசை எண் உள்ளிட்ட விவரங்கள் பெறப்பட்டன. ஏற்கனவே, அந்த விவரங்களை தயார் நிலையில் வைத்திருந்த ஆசிரியர்கள் பலரும், படிவத்தை பூர்த்தி செய்து கொடுத்துள்ளனர்.

மற்றவர்கள், மே, 7ம் தேதி நடக்கும் இரண்டாம் கட்ட பயிற்சி வகுப்பின்போது, சமர்ப்பிக்க அறிவுறுத்தப்பட்டது. ஆனால், புதிய வேட்பாளர் பட்டியலில், பலரின் வாக்காளர் வரிசை எண் மாறியுள்ளது. வாக்காளர் அடையாள அட்டையை கொண்டு, இணைய தளத்தில் பரிசோதிக்கும்போது, பழைய வாக்காளர் வரிசை எண்ணே காட்டுகிறது. இதனால், எந்த வரிசை எண்ணை படிவத்தில் எழுதுவது என குழப்பம் நிலவுகிறது. அப்படி மாற்றி எழுதும்பட்சத்தில், செல்லாத ஓட்டாக கணக்கிடப்படும் என்பதால், பலரும் கவலையில் உள்ளனர். தவறான வரிசை எண் எழுதப்படும் பட்சத்தில், தபால் ஓட்டு கிடைக்காமல் போக வாய்ப்புள்ளது. மே, 7ம் தேதி படிவம் ஒப்படைத்து, அதன்பின் தேர்தல் கமிஷன், அந்த படிவங்களை ஆய்வு செய்து, தபால் ஓட்டுகளை அனுப்புவதற்குள், தேர்தல் பணிக்கு ஆசிரியர்கள் கிளம்ப வேண்டியிருக்கும்;

இதனால், இந்த ஆண்டும் ஆசிரியர்கள் பலரும், ஓட்டு போட முடியாத நிலை ஏற்படும் என, ஆசிரியர்கள் குற்றம் சாட்டுகின்றனர். தேர்தல் நடத்த உதவும் ஆசிரியர்கள், தங்கள் ஓட்டுகளை முன்னதாகவே பதிவு செய்ய வசதியாக, முன்கூட்டியே தபால் ஓட்டுகளை வழங்க, தேர்தல் கமிஷன் நடவடிக்கை எடுக்க வேண்டும் என கோரிக்கை விடுத்துள்ளனர்

குறள் விளக்கம்

துப்பார்க்குத் துப்பாய துப்பாக்கித் துப்பார்க்குத்
துப்பாய தூஉம் மழை.
இந்தக் குறளுக்குப் பொருள் கூறுங்கள், விளங்கினாற்போலும் விளங்காததுபோலும் இருக்கிறது என்று சிலர் கேட்கின்றனர்.
இந்தக் குறளுக்கான பொருளை எல்லாரும் ஓரளவு அறிவார்கள். உணவை உண்பவர்களுக்கு உணவை விளைவித்துத் தருவதும், உணவுண்போர்க்குத் தானே உணவாக ஆவதும் மழையே - என்பது அதன் பொருள்.
குறள்வழியே பொருளுணரும்படி சொல் சொல்லாகப் பிடித்து விளக்கினால்தான் உங்களுக்குக் குறளின் பெருமையும் பொருளின் அருமையும் புரியும். விளக்குகிறேன்.
இக்குறளில் பயிலும் துப்பு என்னும் சொல்லின் பொருள் ‘உணவு’.
துப்பு என்பதற்கு எண்ணற்ற பொருள்கள் காணப்படினும் இங்கு அதற்கு உணவு என்பதே பொருள்.
இப்போது குறளுக்குப் போவோம்.
துப்பு = உணவு
துப்பார்க்கு = உண்போர்க்கு.
பெயர்ச்சொல்லோடு அன், அள், ஆர் விகுதி சேர்த்தால் அப்பெயர்க்குரிய உயர்திணையைக் குறிப்பதாகிவிடும்.
எடுத்துக்காட்டாக, வம்பு என்பதோடு மேற்காணும் விகுதிகளைச் சேர்த்தால் வம்பன், வம்பினள், வம்பார் என வம்பு செய்வோரைக் குறிக்கிறோமே, அதுபோல.
ஆக, துப்பார்க்கு = உண்போர்க்கு
அடுத்து, துப்பாய’ என்றால் ‘உணவாகும்படியான’
தலையாய கடமை என்பதில் உள்ள தலையாய-விற்கு என்ன பொருள் கருதுகிறோம் ? ‘தலையாகும்படியான, தலையாகத்தக்க.’ அதுபோல துப்பாய என்றால் உணவாகும்படியான, உணவாகத்தக்க.
துப்பாக்கி = துப்பு + ஆக்கி = உணவாக்கி. இச்சொற்றொடர் உங்களுக்கு எளிமையாய் விளங்குகின்ற ஒன்று.
இதுவரை பார்த்தது குறளின் ஒரு பகுதி.
துப்பார்க்குத் துப்பாய துப்பாக்கி = உண்போர்க்கு உணவாகும்படியான உணவை ஆக்கி. (1)
அடுத்த பாதிக்குச் செல்வோம்.
குறளின் நான்காம் சீர் என்ன ? மீண்டும் துப்பார்க்கு.
இங்கும் அதே பொருள்தான்.
துப்பார்க்கு = உண்போர்க்கு.
துப்பாயதூஉம் = இந்தச் சொற்றொடரில் உ என்ற அளபெடையை நீக்கிக்கொள்ள வேண்டும்.
செய்யுளில் இதுபோல் எங்கே அளபெடையைக் கண்டாலும் அவ்வெழுத்தை நீக்கிவிட்டு அதற்கு முன்னுள்ள எழுத்தைக் குறிலாய்க் கருத வேண்டும்.
துப்பாயதூஉம் என்பதில் உ என்னும் அளபெடையை நீக்கினால் கிடைப்பது துப்பாதூ__ம். அதற்கு முன்னுள்ள நெடிலைக் குறிலாக்கினால் துப்பாயதும்.
இவ்வாறு கிடைக்கும் இறுதிச் சொற்றொடரைத்தான் நாம் பொருள்கொள்ளக் கருதவேண்டும். நமக்குக் கிடைத்துள்ள இறுதிச் சொற்றொடர் ‘துப்பாயதும்’.
துப்பாயதும் = துப்பு ஆயதும் = ஆயது என்றால் ஆவது.
துப்பாயதும் = உணவு ஆவதும்.
குறளின் இரண்டாம் பகுதிக்கு முழுப்பொருள் காண்போம்.
துப்பார்க்குத் துப்பாயதூஉம் மழை = உண்போர்க்கு உணவாவதும் மழை. (2)
இப்போது (1) மற்றும் (2) ஆகிய இவ்விரண்டு பொருள் முடிவுகளையும் ஒன்றாக்கிப் பாருங்கள்.
துப்பார்க்குத் துப்பாய துப்பாக்கி = உண்போர்க்கு உணவாகும்படியான உணவை ஆக்கி.
துப்பார்க்குத் துப்பாயதூஉம் மழை = உண்போர்க்கு உணவாவதும் மழை.
துப்பார்க்குத் துப்பாய துப்பாக்கித் துப்பார்க்குத்
துப்பாய தூஉம் மழை.
உண்போர்க்கு உணவாகும்படியான உணவையும் ஆக்கி, உண்போர்க்குத் தானே உணவும் ஆகும் மழை.
தெளிவாக விளங்கிக்கொண்டீர்களா ?

பிஎப்புக்கு 8.7% வட்டி தரக்கூட நிதியே இல்லை: நிதியமைச்சகம் திடீர் விளக்கம்

பிஎப்புக்கு 8.7 சதவீத வட்டி வழங்கக்கூட நிதியில்லை என நிதியமைச்சகம் தெரிவித்துள்ளது. தொழிலாளர் வருங்கால வைப்புநிதி சந்தாதாரர்களுக்கு 2015-16 நிதியாண்டுக்கான வட்டியாக 8.8 சதவீதம் அளிக்க வேண்டும் மத்திய அறக்கட்டளை வாரியம் பரிந்துரை செய்திருந்தது. ஆனால் நிதியமைச்சகம் 8.7 சதவீதம் வழங்க ஒப்புதல் அளித்தது.

பிஎப் நிறுவனம் கடந்த 2013-14 மற்றும் 2014-15 நிதியாண்டுகளுக்கான வட்டியாக 8.75 சதவீதம் வழங்கியது. இது 2012-13 நிதியாண்டில் 8.5 சதவீதமாகவும், 2011-12 நிதியாண்டில் 8.25 சதவீதமாகவும் இருந்தது. இதற்கு முன்பு கால் சதவீதம் அளவுக்கு வட்டி உயர்த்தப்பட்டது. அதோடு கடந்த பிப்ரவரி 16ம் தேதி 2015-16க்கான இடைக்கால பிஎப் வட்டி விகிதமாக 8.8 சதவீதமாக முடிவு செய்யப்பட்டது. இந்த இடைக்கால வட்டியை கூட தர மறுத்துள்ளது நிதியமைச்சகம். இந்த முடிவுக்கு தொழிற்சங்கங்கள் கடும் கண்டனம் தெரிவித்தன.

அதோடு, சிஐடியு, ஏஐடியுசி உள்ளிட்ட 10 தொழிற்சங்கங்கள் நாடு முழுவதும் நாளை ஆர்ப்பாட்டம் நடத்துவதாக அறிவித்துள்ளன. இதற்கிடையில், வட்டி குறைத்ததற்கு நிதி பற்றாக்குறையே காரணம் என நிதியமைச்சகம் கூறியுள்ளது. இதுகுறித்து நிதியமைச்சக வட்டாரங்கள் கூறியதாவது:கடந்த 2014-15 நிதியாண்டில் பிஎப் நிதி முதலீடு மூலம் கிடைத்த வருவாய் ரூ.1,604.05 கோடி உபரி இருந்தது. தற்போது 8.8 சதவீத வட்டி அளித்தால் இந்த உபரித்தொகை ரூ.673.85 கோடியாக குறைந்து விடும். இதே நிலை நீடித்தால் அடுத்த ஆண்டு இந்த அளவுக்கு கூட நிலையான வட்டி கொடுக்க முடியாத சூழ்நிலை ஏற்பட்டு விடும். 8.7 சதவீதம் கொடுத்தால் இந்த உபரி ரூ.1,000 கோடியாக இருக்கும்.

ஆனால் இதை தரக்கூட போதுமான நிதியில்லை. அதுமட்டுமின்றி, செயல்படாத 9 கோடி பிஎப் கணக்குகளில் உள்ள ரூ.35,000 கோடிக்கு மேற்பட்ட மூலனத தொகையில் கிடைத்த வட்டி வருவாய் மத்திய அறக்கட்டளை குழு முடிவின்படி தற்போது செயல்பாட்டில் உள்ள கணக்குகளுக்கு பகிர்ந்தளிக்கப்பட்டுள்ளது என தெரிவித்துள்ளனர்.

மே 9ம் தேதி பிளஸ் 2 ரிசல்ட்? கல்வித்துறை செயலாளர் முடிவுக்காக காத்திருப்பு

பிளஸ் 2 தேர்வு முடிவுகள் மே 9ம் தேதி வெளியிட பள்ளிக் கல்வித்துறை ஆலோசித்து வருகிறது. பிளஸ் 2 தேர்வுகள் மார்ச் 4ம் தேதி தொடங்கி ஏப்ரல் 1ம் தேதி முடிந்தன. தேர்வு விடைத்தாள்கள் திருத்தும் பணி மார்ச் 14ம் தேதி தொடங்கி ஏப்ரல் 23ம் தேதி வரை நடந்தது.

சென்னை கோட்டூர்புரத்தில் உள்ள டேட்டா சென்டரில் மதிப்பெண் பட்டியல் தயாரிக்கும் பணிகள் நடக்கிறது. கடந்த ஆண்டு நடந்த தேர்வின் முடிவுகள் மே 2வது வாரத்தில் வெளியிட்டனர். ஆனால் இந்த ஆண்டு சட்டப் பேரவை தேர்தல் அறிவிக்கப்பட்டு, தேர்தல் விதிமுறைகள் நடமுறையில் உள்ளன. ஆனாலும், தேர்தலுக்கு முன்னதாகவே பிளஸ் 2 தேர்வு முடிவை வெளியிட வேண்டும் என்று அரசு அழுத்தம் கொடுத்து வருகிறது.

தேர்வு முடிவுகள் வெளியாகும் தேதி குறித்து பள்ளிக் கல்வித்துறை செயலாளர் சபீதாவின் முடிவுக்காக தேர்வுத்துறை காத்திருக்கிறது. இதில் தேர்வுத்துறை ஏதும் செய்ய முடியாத நிலையில் உள்ளதாக தேர்வுத்துறை வட்டாரங்கள் தெரிவிக்கின்றன.